Թուրքիայում մինչ օրս ցեղասպանություն բառն արտասանելը նշանակում է հանցագործություն գործել: Այս մասին այսօր՝ ապրիլի 22-ին, Հայոց ցեղասպանության 100-րդ տարելիցին նվիրված «Ընդդեմ ցեղասպանության հանցագործության» երկօրյա գլոբալ ֆորումի ժամանակ հայտարարել է թուրք պրոֆեսոր Չենգիզ Աքթարը:
Նրա խոսքով՝ այլեւս չկա Թուրքիա, կա Թուրքիա հոգնակի թվով, կա պաշտոնական Անկարան եւ կան մարդիկ թուրքական հասարակությունում, որոնք բոլորովին այլ կերպ են մտածում:
Պրոֆեսորը նշել է, որ այսօր Թուրքիայում գրեթե յուրաքանչյուր հրատարակչություն առնվազն մեկ գիրք հրատարակել Հայոց ցեղասպանության վերաբերյալ: Հայ արվեստի, երաժշտության, ճարտարապետության ժառանգությունը մարդիկ նույնականացնում են հայերով բնակեցված տարածքների հետ:
«Գնալով ավելի ու ավելի շատ թուրքեր ու քրդեր են հայտարարում, որ իրենք հայ են, միաժամանակ ուզում են մնալ մահմեդական կամ վերադառնում են քրիստոնեությանը: Սակայն Թուրքիայում մինչ օրս ցեղասպանություն բառի օգտագործումը հանցագործություն է համարվում ըստ երկրի Սահմանադրության 305-րդ հոդվածի: Միաժամանակ մարդկ սկսում են հասկանալ, թե ինչքան շատ բան են կորցրել հայերին ոչնչացնելով: Ես կուզենայի հիշեցնել իմ սիրելի Հրանտին (Դինքին) ում սպանեցին, արդարությունը վերականգնելու նրա ծարավը կորսված չէ, արդարությունը կվերականգնվի»,-ասել է թուրք պրոֆեսորը: