Ապրիլի 24-ի միջոցառումները կարեւոր են ոչ միայն Հայաստանում, այլեւ Թուրքիայում: Այս մասին այսօր՝ ապրիլի 22-ին, լրագրողների հետ զրույցում ասաց ZAMAN պարբերականի ֆոտոլրագրող Սելլահաթին Սեւին՝ ավելացնելով, որ Վատիկանում Հռոմի Ֆրանցիսկոս պապի մատուցած պատարագը նպաստեց, որպեսզի միջազգային հասարակությունը ավելի շատ խոսի Հայոց ցեղասպանության մասին:
«Պապի հայտարարությունը նպաստեց, որ հասարակության մի քիչ ավելի մեծ հատված լսի եւ խոսի Հայոց ցեղասպանության մասին, որովհետեւ բոլոր թերթերը գրեցին այդ մասին: Հասարակության օրակարգում այս օրերին ավելի շատ է Հայոց ցեղասպանության հարցը, քանի որ 100-րդ տարելիցն է»,- ասաց ֆոտոլրագրողը՝ նշելով, որ Թուրքիայի քաղաքացիների կարծիքները Ցեղասպանության մասին տարբեր են:
Լրագրողների հարցին, թե ինչու է Թուրքիան որոշել Գալիպոլիի ճակատամարտի 100-րդ տարելիցը նշել հենց Ապրիլի 24-ին, թուրք ֆոտոլրագրողը նշեց, որ իրենց իշխանությունները փորձել են հավասարակշռել համաշխարհային ուշադրությունը:
«Հաշվի առնելով Հայաստանում տեղի ունեցող միջոցառումները եւ համաշխարհային ուշադրությունը՝ որոշեցին փոքր-ինչ հավասարակշռել: Կարծում եմ՝ պետք չէ շատ մեծ կարեւորություն տալ դրան, քանի որ այնպիսի մարդիկ են գնալու Թուրքիա, որոնք որեւէ ճակատագրական նշանակություն չեն կարող ունենալ. ի վերջո, ամենակարեւոր հյուրը՝ Օբաման, այս պահին ոչ Թուրքիայում է, ոչ Հայաստանում»,- ասաց Սելլահաթին Սեւին՝ մտահոգություն հայտնելով, որ Թուրքիայի համար ամենամեծ անակնկալը Ռուսաստանի նախագահ Վլադիմիր Պուտինի հայաստանյան այցն է:
«Չեմ կարծում, որ Հայաստան գալուց հետո Թուրքիայի եւ Ռուսաստանի հարաբերությունները կփչանան, միմյանց հետ շատ լուրջ տնտեսական կապերի մեջ ենք, պարզապես Թուրքիայի համար սա անակնկալ էր»,- ասաց ֆոտոլրագրողը:
