ԱՄՆ մի շարք ազդեցիկ կոնգրեսականներ եւ սենատորներ հավաքվել են Կապիտոլիումի բլրի վրա Հայոց ցեղասպանության զոհերի հիշատակին հարգանքի տուրք մատուցելու համար։ Այս մասին տեղեկացնում է NEWS.am-ի թղթակիցը Վաշինգտոնից։
Ինչպես իր ելույթում հայտարարել է Ֆրենկ Փալլոնեն, որը միջոցառման ավարտին ամերիկյան պատվիրակության կազմում մեկնել է Հայաստան՝ մասնակցելու ապրիլի 24-ին նվիրված միջոցառումներին, անցյալում ԱՄՆ պատմության մեջ եղել են դեպքեր, երբ Ցեղասպանությունը ճանաչվել է ինչպես ԱՄՆ նախագահների, այնպես էլ Կոնգրեսի կողմից։
«Այդ ճանաչումը շատ կարեուր հարց է ոչ միայն մեր երկրի, այլ նաեւ Թուրքիային հստակ մեսիջ ուղարկելու համար»,- հայտարարել էՓալոնեն։
Կոնգրեսական Ռոբերտ Դոլդը հիշեցրել է, որ Հայոց ցեղասպանությունը, որը մարդկության դեմ գործած ամենավատ հանցագործությունն է, բացասական հետք է թողել մարդկության պատմության մեջ։ Ռոդ Այլենդի սենատոր Ջեք Ռիդը նշել է ԱՄՆ զարգացման մեջ հայերի ունեցած ներդրումը։
«Մենք կշարունակենք օգնություն ցույց տալ Հայաստանի զարգացմանն ու ամրապնդմանը»,- հայտարարել է սենատորը՝ նշելով, որ մայիսի 7-ին իր հրավերով ԱՄՆ սենատում ելույթ կունենա Մեծի Տանն Կիլիկիո կաթողիկոս Արամ Առաջինը։
Մինեսոտայի սենատոր Էմի Քլոբուչարնը առաջարկել է հարգել Ցեղասպանության զոհերի հիշատակը։
«Եկեք հիշենք բոլոր ամուսիններին, եղբայրներին, որոնք ստիպված էին կռվել պատերազմում, եւ այլեւս չվերադարձան, բոլոր կանանց, աղջիկներին եւ քույրերին, որոնց բռնաբարեցին»։