Հռոմի Պապի հայտարարությանը հետեւած Թուրքիայի բացասական արձագանքը վկայում է, որ Անկարան պատրաստ չէ ճանաչել Հայց ցեղասպանության փաստը։ Այս մասին NEWS.am-ի հետ զրույցում հայտարարեց Ֆրանսիա-Ղարաբաղ բարեկամության շրջանակի նախագահ Ֆրանսուա Ռոշբլուանը՝ պատասխանելով հարցին, թե ինչ ապագա ունեն հայ-թուրքական հարաբերությունները, եթե հաշվի ենք առնում, որ Թուրքան ժխտում է Ցեղասպանության փաստը։
«Ցավոք սրտի, Թուրքիան չի գիտակցում, որ Ցեղասպանության ճանաչումն իր օգտին է, եւ դա բխում է ոչ միայն կառավարության, այլ նաեւ ժողովրդի շահերից։ Ռեջեփ Թայիփ Էրդոանի արձագանքը վկայում է, որ պաշտոնական Անկարան սխալ ճանապարհով է գնում։ Ցավոք, հայ-թուրքական հարաբերությունների կարգավորման հարցում Թուրքիան զիջել է Ադրբեջանին՝ անհնար դարձնելով հետագա իր զարգացման հնարավորությունը»,- ասել է Ռոշբլուանը։
Քաղաքական գործչի կարծիքով՝ մի օր Թուրքիան ստիպված է լինելու ճանաչել սեփական պատմությունը եւ որքան շուտ, այնքան լավ։ «Ես շատ ուրախ եմ, որ Գերմանիան բավական հասունացել է Ցեղասպանությունը ճանաչելու համար։ Ես հպարտ եմ, որ Ֆրանսիան առաջին պետությունն է, որը օրենքի մակարդակով ճանաչել է Հայոց ցեղասպանությունը։ Ես հույս ունեի, որ 100-ամյակին Թուրքիան կճանաչեր կատարվածը, ինչը երկու կողմերի շահերից է բխում։ Հայոց ցեղասպանությունն աստիճանաբար ճանաչել են բոլոր եվրոպական երկրները, սակայն ափսոս, որ Թուրքիան այդ ցուցակում կլինի վերջինը»,- ասաց նա։
Ինչ վերաբերում է ղարաբաղյան հակամարտության կարգավորմանը, ապա Ռոշբլուանի խոսքով՝ Ադրբեջանը քրեական երկիր է, եւ շատ բաներ դրանով են պայմանավորված։ «Ադրբեջանը նկարագրելու համար ես ուրիշ բառեր չունեմ։ Այն փաստը, որ մարդասպան Ռամիլ Սաֆարովը այդ երկրում ազգային հերոս է ճանաչվել, ապացուցում է այդ երկրի քրեական էությունը ճիշտ այնպես, ինչպես իշխանության վերաբերմունքը շարքային ադրբեջանցիների հանդեպ։ Դա անընդունելի է։ Իրականում այդ երկիրը կոչվում է «Ալիեւ»։ Եվ ամենասարսափելին այն է, թե ինչ է անում Ալիեւն իր ազգի հետ։ Ցավում եմ, որ նման Ադրբեջանում են կազմակերպվում «Եվրոպական խաղերը» եւ «Եվրոպայի գրան պրի-2016»-ը,- եղրափակեց նա։