Հայոց ցեղասսպանության ճանաչմանն ուղղված հայերի պայքարն օրինակ է ծառայում Հարավային Սուդանի ժողովրդի համար, որոնք նույնպես ցեղասպանություն են տեսել: Այս մասին NEWS.am-ին ասաց Հայոց ցեղասպանության 100-րդ տարելիցի միջոցառումների շրջանակում Երեւանում ընթացող միջեկեղեցական ժողովին մասնակցելու համար Հայաստան ժամանած Հարավային Սուդանի անգլիկան եկեղեցու ներկայացուցիչ, եպիսկոպոս Էներ Քոմբաքը:
Եպիսկոպոսի խոսքով՝ հայերի պայքարը լավագույնն է ոգեշնչում հարավային սուդանցիներին:
«Հարավային Սուդանն էլ է տեսել ցեղասպանություն, երբ անկախանում էր: Գիտեք՝ մեր երկիրն ընդամենը 4 տարեկան է, անկախացել ենք 2011թ. հուլիսին՝ երկար տարիների պայքարից հետո: Գիտենք, որ աշխարհում կա էլի մի ազգ, որը մեզ պես տառապել է մեզնից երկար տարիներ առաջ: Այնպես որ հայ ժողովուրդն օրինակ է մեզ համար, առաջին հերթին հիշելու համար, թե ինչ է տեղի ունեցել, երկրորդ՝ այնպես անելու, որ աշխարհի պետություններ ճանաչեն մեր ցեղասպանությունը նույնպես, ինչպես նաեւ հասկանալու, թե ինչպես պետք է պայքարել ապագայում՝ ցեղասպանություններից խուսափելու համար»,- ասաց նա:
Նա նշեց, որ հարավային սուդանցիները շատ բան ունեն՝ սովորելու հայերից:
Նշենք, որ Սուդանի անկախացումից ի վեր` 1956թ., Սուդանի հյուսիսային ու հարավային մասերը 2 անգամ պատերազմել են միմյանց դեմ: Մահմեդական Հյուսիսի նպատակն էր` ամրապնդել իր իշխանությունը կիսաինքնուրույն Հարավի նկատմամբ, ընդլայնել տարածքները եւ ամբողջական վերահսկողություն սահմանել Սուդանի հարավի նավթահանքերի վրա: Մյուս կողմից Հարավն էլ ձգտում էր անկախանալ: 1955–1972թթ. եւ 1983–2005թթ. տեղի ունեցած քաղաքացիական պատերազմների հետեւանքով եղել են մարդկային մեծաքանակ զոհեր. առաջինի դեպքում՝ կես միլիոն, երկրորդի՝ երկու միլիոն մարդ: