Հայոց ցեղասպանությունը պետք է ճանաչվի ՄԱԿ-ի անդամ բոլոր պետությունների խորհրդարանների կողմից։ Այդ մասին Երեւանում ընթացող «Ընդդեմ ցեղասպանության հանցագործության» երկօրյա գլոբալ ֆորումի ընթացքում ասել է Հունաստանի խորհրդարանի նախագահ Զոյի Կոնստանտոպուլուն։
«Մեծ պատիվ է ինձ համար ելույթ ունենալու այս համաժողովի ընթացքում։ Ինձ համար երիցս պատիվ է, որպես քրեական իրավունքի մասնագետի, որպես հույնի, մի ազգի ներկայացուցչի, որը կրել է ցեղասպանության տառապանքը, բայց նաեւ մեծագույն պայքար է մղել միջազգային հանցագործության դեմ։ Մեծ պատիվ է ինձ համար նաեւ ելույթ ունենալ որպես հունական խորհրդարանի նախագահ, խորհրդարան, որն առաջիններից մեկն է ճանաչել հայոց ցեղասպանությունը»,- նշել է Հունաստանի խորհրդարանի նախագահը։
Նրա խոսքով, ցեղասպանությունը հիշելը ոչ միայն հայ ժողովրդի իրավունքն է, նաեւ մարդկության պարտականությունն է, պարտքն է մարդկության նկատմամբ, ապագա սերունդների նկատմամբ։ «Հիշելը կանխարգելման մեխանիզմ է։ Մենք պարտավոր ենք հիշեցնել, որ ցեղասպանությունը ամենավայրագ հանցագործությունն է։ Լրջորեն պետք է ընդդիմանալ օտարատյացությանը, ընդդիմանալ բոլոր վատ երեւույթներին։
Հունական խորհրդարանի եւ անձամբ ինձ համար մեծ պատիվ էր ստանալ համաժողովին մասնակցելու հրավերը»,- ասել է Կոնստանտոպուլուն։
Նա նշել է, որ Հունաստանի խորհրդարանը ներկայումս ակտիվորեն պայքարում է ցեղասպանությունների դեմ։ Մասնավորապես ստեղծվել է հատուկ միջխորհրդանական հանձնաժողով, որը փոխհատուցում է պահանջելու այն վայրագ հանցագործությունների համար, որոնք կատարվել են նացիստական ներխուժման տարիներին։ «Մենք պետք է հիշենք, չկա խաղաղություն առանց արդարության։ Հայոց ցեղասպանությունը պետք է ճանաչվի ՄԱԿ-ի անդամ բոլոր պետությունների խորհրդարանների կողմից»,- ասել է Զոյի Կոնստանտոպուլուն՝ շնորհակալություն հայտնելով Հայաստանի խորհրդարանին, որը վերջերս ճանաչեց Պոնտոսի հույների ցեղասպանությունը. «Միասնաբար մենք կարող ենք հաղթել, պաշտպանել մարդկությունը, ներկայիս եւ հաջորդ սերունդները»։
