Թուրքական հասարակության դիրքորոշումը Հայոց ցեղասպանության հարցում էականորեն տարբերվում է կառավարության դիրքորոշումից։ Թուրք հասարակության մեջ շատերը ճանաչում են Ցեղասպանությունը։ Երեւանում անցկացվող «Ընդդեմ ցեղասպանություն հանցագործության» գլոբալ Ֆորումի ժամանակ նման կարծիք է հայտնել թուրք պրոֆեսոր Չենգիզ Աքթարը։
Նրա խոսքով՝ ինքը ժամանել է գլոբալ ֆորումին մասնակցելու համար, որպեսզի պատմի, թե իրականում ինչ է կատարվում Թուրքիայում։ Նա նշեց, որ թուրքական հասարակությունում շատ բան փոխվում է հատկապես մտավորականության եւ ակտիվիստների մակարդակով, սակայն այդ մասին քչերը գիտեն, քանի որ բոլորը խոսում են թուրքական կառավարության եւ ոչ թե թուրք հասարակության մասին։
«Թուրքիայում կան շատ մարդիկ, որոնք ճանաչում են Հայոց ցեղասպանությունը, եւ դա նորություն է, այդ գործընթացը ընդամենը 20 տարի է, ինչ սկսվել է։ Իհարկե մենք չգիտենք, թե ինչի դա կհանգեցնի»,- նշեց պրոֆեսորը։
Նրա խոսքով՝ որոշակի փոփոխություններ կարելի է նկատել անգամ կառավարական մակարդակով, քանի որ ներկայիս կառավարությունը տարբերվում է նրանից, որը կար անցյալում։ Օրինակ, ապրիլի 24-ին Թուրքիայում պատարագ կանցկացվի, որին ներկա կլինեն կառավարության պաշտոնական անձինք։ Նման բան առաջին անգամ է տեղի ունենում։ Իհարկե դա չի նշանակում, որ պաշտոնական Թուրքիան ճանաչում է ցեղասպանությունը, սակայն դա արդեն ինչ-որ նոր բան է,- նշեց Աքթարը։
Նա նշել է, որ այսօրվա Թուրքիայում կա 2 հայկական համայնք։ Թուրքիայում ապրում են թուրքահայեր, որոնց թիվը կազմում է մոտ 60 000, եւ հայեր, որոնք Թուրքիա են ժամանել արտագնա աշխատանքի։ Նրանց թիվը մոտ 12 000 է եւ ոչ թե 100 000, ինչպես շատերն ասում են։