Թուրքիայի արտգործնախարար Մեւլութ Չավուշօղլուն ամերիկյան CNN հեռուստաընկերության լրագրողների հետ հարցազրույցի ժամանակ չի կարողացել ըմբռնելի կերպով բացատրել, թե ինչու Թուրքիան չի ճանաչում Հայոց ցեղասպանությունը:
Հարցին՝ ինչու Թուրքիան չի ճանաչում Ցեղասպանությունը, Չավուշօղլուն հայտարարել է, որ 1915թ. իրադարձությունները ցեղասպանություն կոչելը ճիշտ չէ, «քանի որ այն իրավաբանական եզրույթ է»:
Այդ բացատրությունը ակնհայտորեն չի բավարարել լրագրողին, ով նշել է, որ 1,5 մլն հայերի սպանությունը համապատասխանում է «ցեղասպանություն» բառի սահմանմանը: «Մենք կիսում ենք հայերի վիշտը եւ ցանկանում ենք հաշտեցում», - ի պատասխան հայտարարել է նախարարը՝ կրկին անգամ հիշեցնելով հարաբերությունների կարգավորմանն ուղղված Թուրքիայի ջանքերի մասին:
Լրագրողը նկատել է, որ եւ Հայաստանի եւ Թուրքիայի համար շատ բան կփոխվեր, եթե Թուրքիան ճանաչեր ցեղասպանությունը:
«Մենք չենք ժխտում, որ շատ մարդիկ են զոհվել, սակայն մենք այն ցեղասպանություն անվանել չենք կարող», - հայտարարել է Չավուշօղլուն: