Ֆրանսիայի իրավապահ մարմինները այս տարվա հունվարին 5 ահաբեկչական գործողություն են կանխել: Այս մասին հայտարարել է երկրի վարչապետ Մանուել Վալսը:
«Շատ ահաբեկչություններ են կանխվել Ֆրանսիայում, ներառյալ այն, որը, բարեբախտաբար, տեղի չունեցավ մի քանի օր առաջ Փարիզի արվարձան Վիլժյուիֆեում»,-ասել է նա, հաղորդում է AFP-ն:
Նախօրեին Ֆրանսիայի նախագահ Ֆրանսուա Օլանդը հայտարարել է, որ Ֆրանսիայում ահաբեկչության սպառնալիքը բարձր է մնում, հաղորդում է «ՌԻԱ Նովոստին»:
Նշենք, որ Ֆրանսիայում ահաբեկչությունների շարքը սկսվել է հունվարի 7-ին, երբ հարձակում գործեցին Charlie Hebdo երգիծական շաբաթաթերթի խմբագրության վրա: Դրանից հետո, հունվարի 8-ին, ահաբեկիչը Փարիզի արվարձանում հարձակվել էր ոստիկանության աշխատակցի վրա: Եվս մեկ օր անց հանցագործները պատանդներ էին վերցրել Փարիզում: Երեք օրում 17 մարդ էր սպանվել, այդ թվում 3 ոստիկան: