Մեկ ու կես միլիոն հայերի սպանությունը ցեղասպանություն էր: Այդ մասին այսօր ապրիլի 23-ին, Երեւանում տեղի ունեցող «Ընդդեմ ցեղասպանության հանցագործության» գլոբալ հասարակական-քաղաքական ֆորումում իր ելույթի ժամանակ հայտարարել է Բունդեսթագի անդամ Ալբերտ Վեյլերը:
Ալբերտ Վեյլերը հայերենով նշել է. «Ինձ համար մեծ պատիվ է ձեզ հետ միասին հարգել անմեղ զոհերի հիշատակը: Ես երախտապարտ եմ պարոն Սարգսյանին հրավերի համար»:
Պատգամավորն ընդգծել է, որ Ցեղասպանության կազմակերպման եւ այն ժխտելու մեղքն ընկած է առանձին մարդկանց, կառավարության, ողջ պետության ուսերին. «Նրանք իրենց վրա մեծ մեղք են վերցրել: Այն երբեք չի մոռացվի: Մեր կառավարությունը դեռեւս միանշանակորեն չի ճանաչել Ցեղասպանությունը, սակայն ոչ ոք երբեք չի մոռանա այդ հանցագործության մասին: Շատ գիտնականներ, խորհրդարանականներ, քաղաքական գործիչներ տարիներ շարունակ Թուրքիային կոչ են արել ճանաչել պատմական իրողությունը: 2005թ. հունիսին Բունդեսթագի բոլոր խմբակցությունները Թուրքիային կոչ արեցին դատապարտել Օսմանյան կայսրությունում հայերի կոտորածը: Եւ ես ուրախ եմ, որ 2015թ. մենք բացահայտ կերպով կարող ենք ադ իրադարձություններն անվանել ցեղասպանություն:
Եվ այս տարի եվրոպական կուսակցությունների ամենամեծ ընտանիքն ընդունեց համապատասխան բանաձեւ, եւ վերջերս Հռոմի Պապը դատապարտեց Հայոց ցեղասպանությունը: Սա ապացուցում է, որ Հայոց ցեղասպանությունը մոռացության չի մատնվի: Մենք հասկանում ենք, որ դա մեր պատմության մի մասն է: Գերմանացիները նույնպես իրենց վրա են վերցրել ծանր մեղք՝ Հոլոքոստը: Մենք կարծում ենք, որ մեզ կատեն, սակայն ներեցին: Դա դժվար էր, ցավոտ, սակայն առանց այդ քննադատության մենք երբեք չէինք հասնի հաշտեցման ու ներման: Ես կցանկանայի, որպեսզի արհեստականորեն կուրացած մարդիկ սկսեն հասկանալ: Մենք կոչ ենք անում թուրքական մտավորականությունը շարունակել աշխատանքը, առավել եւս, որ առկա են դրական միտումներ: Վերջում ցանկանում եմ ասել, որ մենք՝ եվրոպացիներս, ձեր կողքին ենք, եւ այնպես կանենք, որ Ցեղասպանությունը երբեք չմոռացվի:
Կոչ եմ անում լինել բաց ներման եւ հաշտեցման համար»:
