ԱՄՆ նախագահ Բարաք Օբամայի ապրիլքսանչորսյան այս տարվա ուղերձը ցույց տվեց, որ այս տարի «վերջապես նման աշխարհը մոտավորապես մեր կողմն է»: Այս մասին այսօր՝ ապրիլի 24-ին, Ծիծեռնակաբերդի հուշահամալիրում NEWS.am-ին ասաց Ամերիկահայ բարերար Նուբար Աֆեյանը:
«Ամբողջ աշխարհն առհասարակ ճանաչել է Հայոց ցեղասպանությունը, բացի այն երկրից, որտեղ ես եմ ապրում՝ ԱՄՆ-ն: ԱՄՆ նախագահն այսօր առավոտյան իր ուղերձում «Մեծ եղեռն» բառն օգտագործեց, ասաց, որ գնահատում է Հռոմի Պապի խոսքերը, ինչը նշանակում է, որ ինքն ամեն գնով ուզում է հասկացնել… բայց մեծ երկրի ղեկավար է: Ես տխուր եմ, որ նա չգործածեց ցեղասպանություն բառը, բայց միեւնույն ժամանակ կարծում եմ, որ այս տարի վերջապես նման աշխարհը մոտավորապես մեր կողմն է»,- ասաց Նուբար Աֆեյանը:
Նրա խոսքով՝ եթե Թուրքիան ճանաչի Ցեղասպանությունը, նա պարզապես ընդունելու է, որ սխալվել է:
Ամբողջ աշխարհի կողմից Ցեղասպանության ճանաչման համար, ըստ բարերարի, պետք է միավորվի ամբողջ սփյուռքը եւ յուրաքանչյուրը իր հայանպաստ գործով օգնի դրան:
«Սփյուռքում այսօր ապրում է 10 միլիոն հայ, որի մեծամասնությունը կապված չէ Հայաստանի հետ, Հայոց գաղափարությունը չունեն: Եթե զարգացնեն այդ գաղափարությունը, ավելի մեծ ուժ կդառնանք թե Հայաստանում, թե ամբողջ աշխարհում: Կարծում եմ՝ հենց այդ զարգացումն է մեզ պետք, պետք է կապեր ստեղծել, ցանցեր ամբողջ աշխարհում եւ հարատեւ հիշել Հայոց ցեղասպանության մասին»,- ասաց Նուբար Աֆեյանը՝ ավելացնելով, որ մեր ազգի 100 տարվա պայքարը կարող է օրինակ դառնալ այն ազգերի համար, որոնք նույն ճակատագրին են արժանացել:
Նշենք, որ ԱՄՆ նախագահ Բարաք Օբաման իր ամենամյա ապրիլքսանչորսյան ուղերձում 1915-ին տեղի ունեցած իրադարձությունները կրկին չի կոչել «ցեղասպանություն», նա ասել, էր որ այս տարի նշվում է Մեծ եղեռնի՝ 20-րդ դարի առաջին զանգվածային չարագործության 100-րդ տարելիցը: