Գյուղատնտեսության նախարար Գերասիմ Ալավերդյանը այսօր կառավարության նիստից հետո կայացած բրիֆինգում ասաց, որ Հայաստանում ալյուրի թանկացումը հիմնականում պայմանավորված է ալյուր արտադրող գերտերություններում ցորենի ցածր բերքով։ Գյուղատնտեսության նախարարության աշխատանքային խումբը մասնավորապես եղել է Ռուսաստանի Ստավրոպոլի երկրամասում, որտեղ, նախարարի խոսքով, շատ ահավոր վիճակ է, սպասվում է ցածր բերք։ Այնուամենայնիվ՝ դա չի խանգարել Ստավրոպոլյան «Լուչ» սերմնաբուծարանից գնել 950 տոննա «Էլիտա» որակյալ սերմացու։
Նախարարը տեղեկացրեց, որ Հայաստանը ցորեն հիմնականում ներմուծում է Ռուսաստանից, Ղազախստանից, Կանադայից, քիչ քանակությամբ՝ Ուկրաինայից։ Ալյուրի թանկացումը մասամբ պայմանավորված է նաեւ այն սպասումներով, որ ձեւավորված են շուկայում։ Որպեսզի գնային անոմալիաներ չառաջանան, գյուղնախարարությունը փորձում է համագործակցել Տնտեսական մրցակցության պաշտպանության պետական հանձնաժողովի հետ։ Սակայն Գ. Ալավերդյանի կարծիքով՝ արտաքին ազդեցություններից խուսափելու լավագույն ուղին տեղական ցորենի արտադրությունը զարգացնելն է։