Երեւանի Ծիծեռնակաբերդի հուշահամալիրում մեկ րոպե լռությամբ հարգել են Հայոց ցեղասպանության զոհերի հիշատակը, որից հետո հնչել է Հայաստանի Հանրապետության պետական օրհներգը:

Մինչ այդ ՀՀ նախագահ Սերժ Սարգսյանը տիկնոջ՝ Ռիտա Սարգսյանի հետ դեղին վարդ են դրել անմոռուկի տեսք ունեցող ծաղկեպսակի վրա՝ ամբողջական տեսք տալով Հայոց ցեղասպանության զոհերի հիշատակի խորհրդանիշին:

Նշենք, որ մինչ այդ Հայաստանում հավատարմագրված դիվանագետները, տարբեր երկրների խորհրդարանների ներկայացուցիչներ եւս իրենց ձեռքի դեղին վարդերն են ավելացրել անմոռուկի տեսքով ծաղկեպսակի վրա:

Ռուսաստանի նախագահ Վլադիմիր Պուտինը, Ֆրանսիայի նախագահ Ֆրանսուա Օլանդը, Սերբիայի նախագահ Տոմիսլավ Նիկոլիչը եւ Կիպրոսի նախագահ Նիկոս Անաստասիադիսը նույնպես դեղին վարդեր են ավելացրել ծաղկեպսակին՝ հարգելով Հայոց ցեղասպանության զոհերի հիշատակը:

Հայոց ցեղասպանության փաստը ճանաչվել է մի շարք պետությունների կողմից։ Առաջինը 1965թ. դա արեց Ուրուգվայը, որի օրինակին հետեւեցին Ռուսասատնը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուեալան, Արգենտինան եւ ԱՄՆ 42 նահանգ։ Հայոց ցեղասպանությունը ճանաչել է նաեւ Վատիկանը, Եվրախորհրդարանը, Եկեղեցիների համաշխարհային խորհուրդը։