Մոտ ժամանակներում Թուրքիան չի ճանաչի հայոց ցեղասպանությունը: Այդ մասին «Նորությունների ռուսական ծառայությանը» հայտարարել է «Մոսֆիլմ» կոնցեռնի գլխավոր տնօրեն, Ռուսաստանի ժողովրդական արտիստ Կարեն Շահնազարովը:
«Դա պայմանավորված է հնարավոր տնտեսական հետեւանքներով, որոնցից խուսափում է թուրքական կառավարությունը, քանի որ ճանաչումը կարող է պահանջել որոշակի նյութական փոխհատուցում, իսկ կորուստների չափերը զգալի են: Հնարավոր է՝ Թուրքիան մտավախություն ունի, որ կարող են լինել նաեւ տարածքային հավակնություններ: Կարծում եմ՝ նման մտավախությունների բացակայության պարագայում թուրքական կողմը վաղուց էր ճանաչել այդ փաստը», - հստակեցրել է Շահնազարովը:
Կինոռեժիսորը համոզված է, որ Եվրոպան եւ ԱՄՆ-ն այդ հարցում Թուրքիայի վրա ճնշում չեն գործադրի: «Եվրոպացիներն ու ամերիկացիները մի կողմից ցավակցաբար են վերաբերում հայկական հարցին, իսկ մյուս կողմից՝ նրանց համար Հայաստանը աշխարհաքաղաքական խաղում այնպիսի հետաքրքրություն չի ներկայացնում, ինչպես Թուրքիան: Հազիվ թե նրանք այդ հարցում ճնշում գործադրեն Թուրքիայի վրա», - ասել է նա:
Շահնազարովն ընդգծել է, որ ցեղասպանության ճանաչման փաստը կարեւոր է ոչ միայն հայ, այնպես էլ թուրք ժողովրդի համար: