Թուրքիան պետք է առերեսվի իր պատմությանն ու ընդունի այն։ Այդ մասին հայտարարել է Ֆրանսիայի նախկին նախագահ Նիկոլ Սարկոզին, գրում է «Le Figaro»-ն։

Հարցին, արդյոք երբեւէ Թուրքիան կճանաչի Հայոց ցեղասպանությունը, Սարկոզին ասել է. «Ես հավատում եմ։ Չգիտեմ, որքան կպահանջվի, բայց կարծում եմ, ողջամտությունը կհաղթանակի»։

Ֆրանսիայի նախկին նախագահն ասել է. «Ինձ համար ժխտումն ընտրության հարց չէ, դա անգամ կարծիք չէ։ Դա վիրավորանք եւ սպառնալիք է... Ցանկացած ցեղասպանության ժխտումը հասարակարգի խախտում է, քանի որ խաթաում է մեր հանրապետության հիմնարար արժեքները։ Ահա թե ինչու, երբ ես նախագահ էի, հասա Հայոց ցեղասպանության ժխտման քրեականացման օրենքի ընդունմանը»։

Նշենք, որ 2012թ. փետրվարին այդ օրինագիծը չեղարկվեց Ֆրանսիայի Սահմանադրական խորհրդի կողմից, որը հայտարարել էր, թե դա հակասում է խոսքի ազատության իրավունքին։ Գործող նախագահ Ֆրանսուա Օլանդը խոստացել է նոր օրինագիծ ներկայացնել։