Վարչապետ Հովիկ Աբրահամյանն այսօր ընդունել է Լիբանանի արտաքին գործերի եւ էմիգրանտների նախարար Ջեբրան Բասիլին, ով գլխավորում է Հայոց ցեղասպանության 100-րդ տարելիցի ոգեկոչման միջոցառումներին մասնակցող Լիբանանի պատվիրակությունը: Պատվիրակության կազմում են նաեւ Լիբանանի բնական պաշարների եւ ջրային ռեսուրսների նախարար Արթուր Նազարյանը, Լիբանանի կրթության եւ գիտության նախարար Էլիաս Աբուսաաբը։
Վարչապետը, ողջունելով հյուրերին, կարեւորել է Լիբանանի կառավարական պատվիրակության մասնակցությունը Մեծ եղեռնի 100-րդ տարելիցի միջոցառումներին, ինչը վկայում է երկու ժողովուրդների դարավոր ու ամուր բարեկամության մասին: Կառավարության ղեկավարը բարձր է գնահատել Լիբանանի կողմից Հայոց ցեղասպանության ճանաչման ու դատապարտման փաստը եւ շնորհակալություն հայտնել լիբանանահայերի նկատմամբ երկրի իշխանությունների ջերմ վերաբերմունքի համար:
Լիբանանի արտգործնախարարը շնորհակալություն է հայտնել ընդունելության համար եւ Հայաստանի վարչապետին փոխանցել Լիբանանի վարչապետի ողջույնները: Ջեբրան Բասիլը նշել է, որ իր երկրի համար պատիվ է մասնակցել Հայոց ցեղասպանության 100-րդ տարելիցին նվիրված միջոցառումներին՝ բարեկամ հայ ժողովրդին զորակցելու եւ անմեղ զոհերի հիշատակը ոգեկոչելու նպատակով: Նախարար Բասիլը բարձր է գնահատել Հայաստանի ջանքերը հետագա ցեղասպանությունները կանխելու գործում եւ ընդգծել, որ այդ պայքարում Լիբանանը միշտ Հայաստանի կողքին է, որպեսզի նման սարսափելի ոճրագործություններն այլեւս երբեք չկրկնվեն: Պարոն Բասիլն առանձնահատուկ ընդգծել է լիբանանահայ համայնքի ակտիվ դերակատարությունը երկրի քաղաքական, տնտեսական եւ մշակութային կյանքում։ Իր հերթին Լիբանանի կրթության եւ գիտության նախարար Էլիաս Աբուսաաբը տեղեկացրել է, որ Մեծ եղեռնի 100-րդ տարելիցի կապակցությամբ ապրիլի 24-ը լիբանանյան կրթօջախներում ոչ աշխատանքային օր է հայտարարվել։
Հանդիպման ընթացքում զրուցակիցները քննարկել են երկու երկրների միջեւ համագործակցության զարգացման հեռանկարները: Բարձր գնահատելով Հայաստանի եւ Լիբանանի միջեւ քաղաքական երկխոսության մակարդակը՝ կողմերը կարեւորել են նաեւ առեւտրատնտեսական ոլորտում առկա ներուժի լիարժեք իրացումը եւ այդ ուղղությամբ գործնական քայլերի ձեռնարկումը: Մասնավորապես, արծարծվել են տնտեսական կապերի աշխուժացմանը եւ առեւտրաշրջանառության ծավալի աճին միտված ծրագրերի իրականացմանը վերաբերող հարցեր: Այս առումով երկուստեք կարեւորվել է Հայ-լիբանանյան միջկառավարական համատեղ հանձնաժողովի գործունեության ակտիվացումը:
Վարչապետ Հովիկ Աբրահամյանը Լիբանանի վարչապետ Թամամ Սալամին է փոխանցել իր ողջույնները եւ Հայաստան այցելելու հրավերը՝ նշելով, որ այցը հնարավորություն կտա քննարկել երկկողմ տնտեսական համագործակցության խթանման եւ ընդլայնման ուղիները: Իր հերթին Լիբանանի արտգործնախարարը Հայաստանի վարչապետին է փոխանցել Լիբանանի վարչապետի՝ Լիբանան այցելելու հրավերը:
