Ցեղասպանության ընդունման հարցի նկատմամբ իր վերաբերմունքով հայերը օրինակ են ցույց տալիս ողջ աշխարհին: Այդ մասին իր «Երեկոն Վլադիմիր Սոլովյովի հետ» հեղինակային հաղորդման ժամանակ հայտարարել է Վալդիմիր Սոլովյովը:
«Մենք դաստիարակված ենք երեխայի լացի մասին պատկերացումներով, իսկ կյանքը մեզ հակառակ օրինակներ է ցույց տալիս: Մարդկությունը փայլուն կերպով սովորել է ոչնչացնել իր նմաններին՝ հմուտ, ճարպկորեն, լկտիաբար», - ասել է նա:
Նրա խոսքով՝ հայ ժողովուրդը դաժան ողբերգություն է ապրել, բարբարոսաբար, գազանաբար, դաժանաբար ոչնչացվել է 1.5 մլն մարդ, իսկ քաղաքակիրթ աշխարհը դա չի նկատել եւ թքել է դրա վրա:
«Ինչո՞ւմն է հայ ժողովրդի մեծությունը: Նրանք չեն մոռացել: 100 տարի ամբողջ աշխարհով մեկ սփռված հայությունն իր սրտում կրում է այդ դաժան ողբերգության հիշողությունը: 100 տարի նրանք աշխարհին բղավում են. «Դա եղել է եւ դա չպետք է մոռանալ»: 100 տարի նրանք պահանջում են պատմական արդարության վերականգնում», - ասել է Վլադիմիր Սոլովյովը՝ հավելելով, որ եթե այն ժամանակ՝ շատ տարիներ առաջ, մարդկությունը լսեր հայերին ու ճանաչեր ցեղասպանությունը, ապա դրան շատ ուրիշ սպանություններ ու ցեղասպանություններ չէին հետեւի. Պատահական չէ, որ Հիտլերն ասել է՝ կարելի է հանգիստ կերպով ոչնչացնել հրեաներին, սլավոններին ու գնչուներին. չէ՞ որ ոչ ոք չի հիշում Օսմանյան կայսրությունում հայերի ոչնչացման մասին:
«Հայ ժողովուրդը մեզ օրինակ է ցույց տալիս: Ինչպես հայ ժողովուրդն է վերաբերում այդ դաժան ողբերգությանը, այնպես էլ մենք պետք է մեր սրտում պահենք Մեծ հայրենականի ցավն ու փառահեղ հաղթանակի հիշողությունը: Մեր ցավակցությունն ու հարգանքը մեծ ժողովրդին», - ասել է Սոլովյովը: