Հայոց ցեղասպանության հարցում համաշխարհային քաղաքական դաշտում առկա է լուռ համաձայնություն, քանի որ միջազգային կազմակերպությունների կամ աշխարհի երկրների կողմից, բացի Թուրքիայից եւ Ադրբեջանից, մենք չտեսանք Ցեղասպանության ժխտման որոշակի լուրջ փորձ: Այդ մասին այսօր՝ ապրիլի 25-ին, «ԱՅԲ» կրթական ֆոնդում կազմակերպված «Հայոց ցեղասպանության խնդրի կարգավորման ռազմավարություններ» թեմայով կլոր սեղանի ընթացքում հայտարարեց Հայոց ցեղասպանության թանգարան-ինստիտուտի փոխտնօրեն Սուրեն Մանուկյանը:
Նա հավելեց, որ նույնիսկ Թուրքիայի եւ Ադրբեջանի դաշնակիցները, ինչպես, օրինակ, Պակիստանը, այդ հարցի շուրջ ակտիվ քաղաքական դաշտում չէին նշմարվում: Գիտական դաշտում, նկատեց Սուրեն Մանուկյանը, նույնպես առկա է կոնսենսունս: «Գիտական դաշտում Հայոց ցեղասպանության փաստն անհերքելի է: Իհարկե, կան մարդիկ, ովքեր հերքում են այդ փաստը, սակայն նրանց ոչ ոք լուրջ չի ընդունում, նրանց կարելի է համար սահմանային հոսանք: Սա 100 տարվա համար կարեւոր նվաճում է», - ընդգծեց Մանուկյանը: Եւ երրորդ հարթությունը հասարակական ընկալումն է, շարունակեց Հայոց ցեղասպանության թանգարան-ինստիտուտի փոխտնօրենը: