Ոչ ոք Թուրքիային լրջորեն չի ստիպել ճանաչել Հայոց ցեղասպանությունը: Այդ մասին այսօր՝ ապրիլի 25-ին, «ԱՅԲ» կրթական հիմնադրամում կազմակերպված «Հայոց ցեղասպանության խնդրի կարգավորման ռազմավարություններ» թեմայով կլոր սեղանի ընթացքում հայտարարեց Կովկասի ինստիուտի տնօրեն, քաղաքագետ Ալեքսանդր Իսկանդարյանը:
Անդրադառնալով Հայոց ցեղասպանության ճանաչման համար տարվող քաղաքական պայքարին՝ նա ընդգծեց, որ ապացույցների միջոցով ճանաչման հասնելն անհնար է: Արդեն 100 տարի է անցել, եւ Ալեքսանդր Իսկանդարյանի համոզմամբ, իրողությունն այլ է: Ինչ վերաբերում է Ցեղասպանության ճանաչման գործում Թուրքիայի վրա ճնշմանը, քաղաքագետն ասաց. «Մտրակներ կան, սակայն ոչ մի բլիթ, եւ այդ մտրակները բավականին թույլ են Թուրքիայի կողմից Հայող ցեղասպանությունը ճանաչելու համար: Որպեսզի այդ մտրակները գործուն լինեն, ճանաչման գործընթացը պետք է ընդլայնվի»: