Եմենի հարավում ապստամբ շիա հուսիների եւ գործող նախագահ Աբդ Ռաբո Մանսուր Հադիի կողմնակիցների միջեւ բախումների, ինչպես նաեւ արաբական կոալիցիայի օդուժի հարվածների հետեւանքով վերջին մեկ օրվա ընթացքում առնվազն 92 մարդ է զոհվել:
Ինչպես հաղորդում է «Ֆրանս Փրեսը», մարտերն ու հրթիռային կրակոցները տեղի են ունեցել նավահանգստային Ադեն քաղաքում, որն առանցքային նշանակություն ունի:
Զինվորականների տվյալներով, բախումների հետեւանքով 46 հուսիներ են զոհվել, հաղորդում է «ՌԻԱ նովոստին»:
Շիա հուսիները, որոնք ավելի վաղ վերահսկում էին փոքր տարածք Եմենի հյուսիսում, տարվա սկզբին զանգվածային հարձակում են իրականացրել, գրավել մայրաքաղաք Սանան, եւ փաստացի հեռացրել իշխանությունից նախագահ Աբդ Ռաբու Մանսուր Հադիին: Նրանք պահանջում են շիա փոքրամասնությանը սուննիներին հավասար իրավունքներ, նաեւ պետության կառավարմանը մասնակցելու հնարավորություն տալ: Հուսիներին դիմակայում են կանոնավոր զորքերը, տեղի ազգությունների կամավորական խմբերը, ինչպես նաեւ «Ալ կաիդայի» տեղի բջիջը:
