«Իսլամական պետություն» ահաբեկչական խմբավորման զինյալները տեսանյութ են հրապարակել, որում հայտարարում են, որ ժամանել են Եմեն՝ ապստամբ հուսիների դեմ պայքարելու համար:
Տեսանյութը հրապարակվել է այն բանից հետո, որ Եմենում ԻՊ-ի դաշնակիցները՝ այսպես կոչված «Կանաչ բրիգադի» զինյալները, ստանձնել են Իբբ գավառի Իրիմ քաղաքում հուսիների վրա հարձակման պատասխանատվությունը: ՌԻԱ Նովոստիի փոխանցմամբ, այդ ժամանակ 5 մարդ էր զոհվել:
Հուսիները, որոնք նախկինում Եմենի հյուսիսում ոչ մեծ տարածք էին վերահսկում, տարեսկզբին հարձակումներ ձեռնարկեցին, գրավեցին երկրի մայրաքաղաք Սանան եւ իշխանությունից հեռացրեցին նախագահ Աբդ Ռաբբու Մանսուր Հադիին: