Վերջին ժամանակներս Թուրքիան քննադատում է բոլորին՝ Ֆրանսիային, Ռուսաստանին, Եվրախորհրդարանին, Գերմանիային, Ավստրիային, այն բանի համար, որ միջազգային հանրությունը խոսում է մի լեզվով, որը նա չի հասկանում: Այս մասին, այսօր՝ ապրիլի 27-ին, Բելգիայի ԱԳ նախարար Դիդիե Ռեյնդերսի հետ համատեղ ասուլիսի ժամանակ հայտարարել է ՀՀ ԱԳ նախարար Էդվարդ Նալբանդյանը: Նրա խոսքով, դրա հետ կապված թուրքական կողմը մտածելու բան ունի:
Բելգիայի ԱԳ նախարարն իր հերթին նշել է, որ իր երկիրն արդեն երկար տարիներ կոչ է անում Թուրքիային ու Հայաստանին համատեղ աշխատանքներ տանել: «ԵԽԽՎ-ն այդ ուղղությամբ քննարկումներ է նախաձեռնել: Ես կցանկանայի նշել, որ Բելգիան նախաձեռնում է միջոցառումներ, որպեսզի համապատասխան գիտակցություն ձեւավորվի: Կարծում եմ՝ պետք է միջազգային համաժողովներ կազմակերպել, ինչպես նաեւ մերձեցնել տարբեր իրավիճակների վերաբերյալ տարբեր մոտեցումներն ու տեսակետները»,-ասել է Դիդիե Ռեյնդերսը:
