Թուրքական խիստ իշխանամետ Sabah պարբերականի լրագրող Ռասիմ Օզան Քյութահյալըի՝ Հայոց ցեղասպանության վերաբերյալ խիզախ հրապարակումը զարմացրել է թուրքական մամուլին։
Ռասիմ Օզան Քյութահյալըն իր հրապարակման առաջին հատվածում նշում է, որ Թուրքիան երկար ժամանակ ոգեւորված էր թուրքական թեզերը պաշտպանող ամերիկյան գործիչ Ջասթին ՄքՔարթիի պատմություններով։ «ՄքՔարթին չէր հերքում տեղահանության ժամանակ անհավատալի չափերով կոտորածները, սակայն այն միտք է առաջ բերում, որ եթե տեղահանությունը չլիներ, Թուրքիան այսօրվա սահմանները չէր ունենա։ Սրանով թուրքերը հանգստանում էին՝ ուրեմն ամեն ինչ ճիշտ է եղել։ Հենց այդ կետից իմ գիտակցության մեջ շրջադարձային փոփոխություն տեղի ունեցավ։
Ես արդեն ինձ չեմ խաբում։ 1915-ին այս հողերում մեծ աղետ, ցեղասպանություն է տեղի ունեցել։ Մարդկության դեմ հանցանք է տեղի ունեցել։ Նման հանցանքը արդարացնող ամեն խոսքից արդեն սրտխառնոց եմ զգում»,-ամփոփել է Sabah-ի լրագրողը։
