Լեգենդար «Քրոնոս» քառյակը Երեւանում, «Երեւանյան հեռանկարներ» փառատոնի շրջանակներում, կբարձրաձայնի Ցեղասպանության մասին:
Արդեն 16-րդ անգամ անցկացվող «Երեւանյան հեռանկարներ» փառատոնն այս տարի մեկնարկեց ապրիլի 2-ին փառատոնի բարեկամ, աշխարհահռչակ դաշնակահար Եվգենի Կիսինի մենահամերգով:
«Երեւանյան հեռանկարներ» միջազգային փառատոնի տնօրեն Սոնա Հովհաննիսյանի հավաստմամբ, ապրիլ ամիսը շատ խիտ եւ հագեցած է մեծանուն երաժիշտների այցերով: Հատկանշական է որ կատարողները հենց ապրիլին են գալիս իրենց խոնարհումն ու հարգանքը մատուցելու Հայոց ցեղասպանության զոհերի հիշատակին:
Ապրիլի 28-ին ժամը՝13:00-ին Ա. Սպենդիարյանի անվան օպերայի եւ բալետի ազգային ակադեմիական թատրոնում տեղի կունենա մամուլի ասուլիս նվիրված լեգենդար «Քրոնոս» քառյակի բացառիկ համերգին:
Մասնագետների գնահատմամբ, համաշխարհային լարային քառյակների պատմության մեջ, այն իրենից ներկայացնում է այլ ուղղություն եւ որակ:
«Քրոնոսը» ցանկալի հյուր է աշխարհի ցանկացած փառատոնի համար, եւ հատկանշական է, որ այն իր վերաբերմունքն է արտահայտելու Հայոց Ցեղասպանության առթիվ:
«Քրոնոսը» նոր գործ է պատվիրել հայկական ծագմամբ ամերիկացի կոմպոզիտոր Մարի Կույոմջյանին, որի համաշխարհային պրեմիերան տեղի կունենա հենց ապրիլի 29-ին ժամը 19:30-ին նույն դահլիճում կայանալիք համերգի ժամանակ: