Բրիտանացի հայտնի լրագրող Ռոբերտ Ֆիսկն անդրադարձել է Հայոց ցեղասպանության 100-րդ տարելիցի առիթով Ստամբուլում անցկացված միջոցառումներին:
Նրա կարծիքով, թուրքերն այդ հարցում նախաձեռնություն են ցուցաբերում, սակայն հարցն այն է, արդյո՞ք այդ երկրի կառավարությունը կհետեւի նրանց: «The Independent»-ում հրապարակված հոդվածում նա հարց է առաջադրում, թե ի՞նչ կմտածեր Թալեաթ փաշան, եթե տեսներ մի քանի հազար մարդկանց, որոնց 60%-ը՝ ոչ հայեր, Ստամբուլի հնագույն փողոցներից մեկում:
Ֆիսկը նշում է, որ թուրքական լրատվամիջոցները, որոնք «այնքան սիրում են հայերի ծրագրված կոտորածի մասին CNN-ի եւ BBC-ի վախկոտ լեզուն», ամեն դեպքում, ցեղասպանություն բառն ավելի հաճախ են գրել, քան իրենց համար սովորական «իրադարձություններ» եւ «միջադեպեր» բառերը:
Լրագրողի խոսքով, Պուտինն ամոթով թողեց Օբամային՝ Հայաստան մեկնելով եւ 1915 թվականի սպանությունները «ցեղասպանություն» կոչելով: Ֆիսկը հարցադրում է կատարում. միթե՞ Վատիկանից եւ Վիեննայից հետո Թուրքիան նաեւ Մոսկվայից իր դեսպանին հետ կկանչի:
Լրագրողը նշում է, որ Թուրքիան առաջին անգամ նախարար ուղարկեց հայոց պատրիարքարանում անցկացվող հիշատակի միջոցառումներին, իսկ Էրդողանը հայերի դիմեց՝ «կիսում ենք ձեր ցավը» ոգով, ցավը կիսելու համար անհրաժեշտ է ճանաչել արդարությունը, նշանակում է՝ ցեղասպանությունը:
Հեղինակը, սակայն, ընդգծում է, որ արդեն կիրակի Ստամբուլում մասնակցել է համալսարաններից մեկում անցկացված քննարկմանը, որտեղ աշխարհի տարբեր երկրների գիտնականները, այդ թվում՝ Թուրքիայի, Հայոց ցեղասպանության մասին խոսել են առանց չակերտների:
«Այնպես որ՝ հարց է առաջանում, ի՞նչը կհաղթի. արյունը, թե՞ բառը: Ինչ-որ ժամանակ քաջ Թուրքիան կճանաչի Հայոց ցեղասպանությունը, եւ հայերը պետք է օգնեն նրանց: Այդ օրը կգա»: