Միացյալ Նահանգների եւ Իսրայելի համար շահերն ավելի կարեւոր են, քան համամարդկային արժեքները: Այս մասին «Պոզներ» հաղորդաշարին տված հարցազրույցում հայտարարել է Հայաստանի նախագահ Սերժ Սարգսյանը՝ պատասխանելով հարցին, հասկանո՞ւմ է, թե ինչու այնպիսի երկրներ, ինչպիսիք են ԱՄՆ-ն եւ Իսրայելը, չեն ճանաչում Հայոց ցեղասպանությունը:
«Ես հասկանում եմ, բայց չեմ ընդունում»,- նշել է նա՝ հավելելով, որ ԱՄՆ-ի եւ Իսրայելի համար «սեփական շահերն ավելի կարեւոր են, քան համամարդկային արժեքները»:
«Նրանք ելնում են իրենց ազգային շահերից, որոնք արտահայտվում են Թուրքիային չվիրավորելու տեսքով»,- ասել է նա՝ հիշեցնելով, որ Օբաման՝ կոնգրեսական եղած ժամանակ եւ Իսրայելի ներկայիս նախագահ Ռեուվեն Ռիվլինը՝ պատգամավոր եղած ժամանակ, ակտիվորեն հանդես էին գալիս Հայոց ցեղասպանության ճանաչման օգտին:
