«Հրապարակ» թերթը գրում է. «Իշխանական կուլիսներում ակտիվացել են խոսակցությունները սպասվող կադրային փոփոխությունների մասին: Մինչ ապրիլի 24-ը խոսում էին, որ Ցեղասպանության 100-ամյակի միջոցառումներից հետո Սերժ Սարգսյանը ձեռնամուխ է լինելու կտրուկ փոփոխությունների: Մասնավորապես, արտաքին քաղաքականության ասպարեզում խոսվում է, որ կրթության եւ գիտության նախարար Արմեն Աշոտյանին կարող են նշանակել Գերմանիայում դեսպան: Այստեղ Հայաստանի արտակարգ եւ լիազոր դեսպանը վաղամեռիկ ՀՅԴ անդամ Վահան Հովհաննիսյանն էր, եւ նրա մահից հետո այդ պաշտոնը մինչ օրս թափուր է:

Հաջորդ փոփոխությունը, որի մասին խոսում են, ՀՅԴ ներկայացուցչին ԿԳ նախարար նշանակելն է, այս առումով շոշափվում է բազմակի չեմպիոն Լեւոն Մկրտչյանի անունը: Ճամպրուկային տրամադրություններ են նաեւ արդարադատության նախարարությունում, ըստ այդ լուրերի Վրաստանում ՀՀ նախկին դեսպան Հովհաննես Մանուկյանին, իբրեւ բացառիկ ու անգնահատելի դիվանագետի, հիմա էլ ուզում են որպես դեսպան ինչ-որ եվրոպական երկիր ուղարկել:

Արդարադատության նախարարի պորտֆելը եւս, ըստ նախնական քննարկումների, բաժին կհասնի ՀՅԴ-ին: Սակայն սա չի նշանակում, որ ՀՅԴ-ն մինչ օրս անամոթաբար ստել է՝ ասելով, թե բացառվում է կոալիցիա մտնելը, քանի որ մասնավոր անձանց պաշտոններ ստանալը չի ձեւակերպվելու փաթեթի մեջ:

Դաշնակցականները դանդաղ եւ հուշիկ քայլերով իշխանությունը գրավելու պլան են մշակել եւ, փաստորեն, հաջողությամբ իրականացնում են այն: Թեեւ, մեր մեջ ասած, ի՞նչ իմաստ ուներ սեթեւեթելը՝ հանրությունը շատ նորմալ կվերաբերի փաթեթային լուծմանը»:

Առավել մանրամասն՝ թերթի այսօրվա համարում