Ֆրանսիայի ալեւիները ներողություն են խնդրել հայ ժողովրդից այն բանի համար, որ Հայոց ցեղասպանության ժամանակ չեն կարողացել փրկել նրանց: Համապատասխան հայտարարությունը տարածել է Ֆրանսիայի Ալեւիների միությունների դաշնությունը:
«Nouvelles d'Arménie» պարբերականի փոխանցմամբ, ալեւիական կազմակերպության հայտարարությունում, մասնավորապես, նշվում է. «Դարեր շարունակ Անատոլիայի հնագույն ժողովուրդներն ընդհանուր ճակատագիր են ունեցել: Նրանց նույն հողն է կերակրել, նույն ջուրն են խմել, նույն օդն են շնչել եւ նույն արեւի տակ են զարգացել: Սակայն ալեւիների, հայերի, քրդերի, հույների, ասորիների միջեւ այդ ներդաշնակությունը խաթարվեց նրանց կողմից, ովքեր, ուշադրություն չդարձնելով այդ հողերի մշակութային, լեզվական եւ կրոնական հարստությանը, մշտապես ցանկանում էին քաղաքական ձուլման միջոցով, մասամբ՝ շատ դաժան, վերացնել այդ ամենը: Նրանք երկիրը խորտակեցին արյան եւ արցունքների մեջ: Դրանք մռայլ տարիներ էին, երբ 100 տարի առաջ զինվորականներն ու զինված բանդաները տեղահանեցին եւ սպանեցին հայերին ու ասորիներին»:
Այնուհետեւ հայտարարությունում նշվում է. «Մենք օգնություն ցուցաբերեցինք մեր հարեւաններին, որոնք մեր կողքին են եղել մեր հարսանիքների, հուղարկավորությունների, հիվանդության եւ առողջ ժամանակ: Չնայած բազմաթիվ դժվարություններին՝ մենք արեցինք հնարավոր ամեն ինչ, որպեսզի նրանք փրկենք տառապանքներից: Մենք նրանց չէինք հանձնում դահիճների ձեռքը: Ցավոք, չկարողացանք բոլորին փրկել: Մենք չկարողացանք կանխել Հայոց ցեղասպանությունը: Եվ շարունակում ենք մեր մեջ կրել այդ անկարողության ցավը: Մենք՝ ալեւիներս, մեր հարեւաններին, մեր եղբայրներին խնդրում ենք ներել մեզ դրա համար: Դուք, որ մեզ զգուշացնում էիք, որ ձեզանից հետո նաեւ մեր հերթն է հասնելու, խնդրում ենք, ներե՛ք մեզ: Խնդրում ենք, ներե՛ք մեզ Հրանտ Դինքի համար, որի վախկոտ սպանությունը չկարողացանք կանխել»:
