Պաշտոնական տվյալներով՝ հունվար-մարտին Հայաստանում կոնյակի արտադրությունը տարեկան հաշվարկով պակասել է 1.2 մլն լիտրով կամ ավելի քան 1.5 անգամ։ Ինչպես հայտնի է, այդ անկումն ուղղակի կապ ունի այդ խմիչքը Ռուսաստան արտահանելու ծավալների նվազման հետ։
Արտահանման տեսակետից կոնյակը հայրենական արտադրության համար յուրահատուկ ապրանք է։ Ըստ 2013թ. տվյալների՝ Հայաստանում արտադրվող կոնյակի 90 տոկոսը արտահանվում էր։ Արտահանման ծավալներով կոնյակը ավանդաբար 2-րդ տեղն էր զբաղեցնում։ Նշենք, որ Ռուսաստանը մինչեւ 2013թ. ապահովում էր հայկական կոնյակի արտահանման առյուծաբաժինը՝ 80 տոկոս։
Հունվար-մարտ ամիսների տվյալներն ամբողջական չեն ձեռներեցների տրամադրած հաշվետվությունների հետ առկա խնդիրների պատճառով։ Այս երկու գործոնների հետեւանքով կոնյակի հաշվեկշիռը բավական տարօրինակ տեսք ունի։ Արտահանումը կազմել է ընդամենը 7 տոկոս։ Ստացվում է, որ արտադրված կոնյակի գրեթե ողջ ծավալը մնացել է Հայաստանում։