Հայաստանի օմբուդսմենի գրասենյակը առավել արդյունավետ կերպով իր ներուժն օգտագործում է երկրում կոռուպցիոն երեւույթները կանխելու համար։ Այս մասին ապրիլի 30-ին Հայաստանի օրինական ազգային համակարգի գնահատման մասին Transparency International հակակոռուպցիոն կենտրոնի 2014թ. զեկույցը ներկայացնելիս լրագրողներին հայտարարեց հակակոռուպցիոն կենտրոնի գործադիր տնօրեն Վարուժան Հոկտանյանը՝ համեմատելով Օմբուդսմենի ինստիտուտը լրատվամիջոցների, հասարակական կազմակերպությունների, պետական ինստիտուտների հետ։
Նա հիշեցրեց, որ սա 2003թ.-ից սկսած Transparency International-ի թվով երրորդ զեկույցն է։ «Ընդհանուր առմամբ Հայաստանում լճացման իրավիճակ է։ Մեր ուսումնասիրության նպատակն է ոչ թե պարզել, թե որքան կոռումպացված է այս կամ այն հաստատությունը, այլ այն, թե այդ հաստատությունը որքան ներուժ ունի կաշառակերության դեմ պայքարելու համար»,- նշեց Հոկտանյանը։
Զեկույցի արդյունքներով նման ներուժ ունեն այն պետական հաստատությունները, որոնք բավական անկախ են եւ բավարար ռեսուրսներ ունեն, ինչպես օրինակ նախագահի ինստիտուտը կամ գործադիր իշխանությունը։ «Այստեղ միաժամանակ խնդիրներ են առաջանում թափանցիկության եւ հաշվետու լինելու հետ։ Մենք առանձնացրել ենք նաեւ 2 հիմնական մարտահրավեր. առաջին՝ բավականին վիճելի է Հայաստանում լրատվամիջոցների առաջնային ներուժը, այսինքն՝ որքանով են նրանք պատրաստ եւ կարող են կատարել կաշառակերության դեմ պայքարում իրենց աշխատանքը եւ երկրորդ՝ իշխանությունների ճյուղերի միջեւ զսպման եւ հաշվեկշռի հարցը։ Օրինակ՝ դատական համակարգը կախյալ է մնում, եւ դա հանգեցնում է նրան, որ դատական իշխանությունը չի իրականացնում կաշառակերության կանխման իր բաժինը»,- եզրափակել է Transparency International-ի հակակոռուպցիոն կենտրոնի գործադիր տնօրենը։