Ավստրալիայի Մելբուռն քաղաքում այսօր՝ մայիսի 1-ին, մոտ 5 հազար մարդ դուրս է եկել փողոց՝ բողոքելով Արեւմտյան Ավստրալիա նահանգում աբորիգենների բնակավայրերի փակման դեմ, հաղորդում է ABC հեռուստաալիքը:
Հաղորդվում է, որ բողոքի կազմակերպիչներն են «Աբորիգենների դիմադրության մարտիկներ» խմբի ակտիվիստները, որոնք պաշտպանում են մայրցամաքի բնիկների իրավունքները, որոնց համայնքներից մի քանիսը փակման վտանգի տակ են:
«Մեր բողոքը աբորիգենների ինքնավարության հպարտ արտահայտություն է եւ ահազանգ կառավարությանը, որ մեր դիմադրությունը գնալով ուժեղանալու է»,-ասված է կազմակերպիչների հայտարարությունում: Նաեւ նշվում է, որ բողոքի մասնակիցները ցանկանում են, որ երկրի եւ ողջ աշխարհի բնակիչները տեղեկանան բնիկների բնակավայրերի վերացման վտանգի մասին, հաղորդում է «ՌԻԱ նովոստին»:
Ավելի վաղ Արեւմտյան Ավստրալիայի կառավարությունը հայտնել էր, որ ֆինանսական միջոցների սղության պատճառով կա վտանգ, որ կփակվեն աբորիգենների 274 բնակավայրերը: