Ուռուցքաբանության ազգային կենտրոնում մարտի 12-ին մահացած 61-ամյա կնոջ դեպքով բողոքը Գլխավոր դատախազությունից ուղարկվել է Քննչական կոմիտեի Երեւան քաղաքի Քանաքեռ-Զեյթուն վարչական շրջանի քննչական բաժին: Այս մասին NEWS.am-ին ասաց փաստաբան Արայիկ Պապիկյանը, որն էլ կնոջ մահվան դեպքով գրություն էր ուղարկել գլխավոր դատախազին:
«Մահացած կնոջ որդին հաղորդում է տվել, ենթադրում ենք, որ առաջիկա օրերին քրեական գործ կհարուցվի, նշանակվեն փորձաքննություններ»,- ասաց փաստաբանը:
Նա պատմեց, որ 61-ամյա կինը ուռուցքաբանության ազգային կենտրոն է դիմել այս տարվա մարտի 2-ին, նրա մոտ ախտորոշվել է քաղցկեղ, բժիշկները բուժում են նշանակել: Մինչդեռ կինը լյարդի հետ կապված խնդիր է ունեցել, որը բժիշկները հաշվի չեն առել:
«Այնպիսի բուժում են նշանակել, որ լյարդին վնաս է: Բժշկական փաստաթղթերում էլ առկա են լյարդի հետ կապված խնդիրները, մինչդեռ բժիշկը դրանց ուշադրություն չի դարձրել եւ բուժում է նշանակել: Հետեւաբար, մեր կարծիքով, բժշկական սխալ կա»,- ավելացրեց բժիշկը:
Ավելի վաղ հաղորդել էինք, որ 61-ամյա Ս. Պ.-ն Ուռուցքաբանության ազգային կենտրոնում մարտի 2-ին քիմիաթերապիա է ընդունել եւ մարտի 12-ին մահացել: Այս առթիվ Փաստաբանների պալատի փաստաբան Արայիկ Պապիկյանը դիմել էր Գլխավոր դատախազին՝ նշելով, որ կինը, առանց լյարդի պատշաճ հետազոտության, ենթարկվել է քիմիաթերապիայի, որի լյարդային անբավարարության պատճառով մահացել է: