Նախորդ տարվա հունիսի 22-ին Ուկրաինայի Նիկոլաեւ քաղաքի խաղատներից մեկում կրկնակի սպանության մեղադրանքով ցմահ ազատազրկման դատապարտված, Երեւանի 37-ամյա բնակիչ Էդգար Գեւորգյանի մայրը սպառնում է նախագահականի մոտ ինքնահրկիզվել, եթե որդուն չարդարացնեն: NEWS.am-ի հետ զրույցում Էդգարի մայրը՝ Հասմիկ Վանյանը, պատմեց, որ որդուն ցմահ ազատազրկման են դատապարտել խոշտանգումով կորզված ինքնախոստովանական ցուցմունքի եւ նրա հիման վրա, որ վերջինը նա է զանգահարել խաղատուն:
«Ուկրաինայի դեսպանատան մոտ բողոքել եմ ու ասել՝ եթե արդար վճիռ չկայացվի, ես կինքնահրկիզվեմ: Գոնե նման կերպ իմ ձայնը տեղ կհասնի եւ արդարություն կհաստատվի: Ինձ միայն ուժ է տալիս այն, որ իմ տղան մեղավոր չէ, նրա ձեռքերն արյունոտ չեն»,-ասաց տիկին Հասմիկը:
Էդգարի մայրը պատմեց, որ դեպքը տեղի է ունեցել 2013թ. մարտի 24-ի, լույս 25-ի գիշերը, Ուկրաինայի Նիկոլաեւ քաղաքում: Խաղատներից մեկում կատարվել է կրկնակի սպանություն. դանակի հարվածներով սպանել են գանձապահին եւ անվտանգության աշխատողին:
«Այդ օրը իմ տղան էլ է գնացել խաղատուն, բայց ոչնչից տեղյակ չէ, վերադարձել է հյուրանոց, քանի որ 2 օրից վերադառնալու էր Հայաստան: Առավոտյան 11:00-ի կողմերը ոստիկանները նրան բերման են ենթարկում եւ նրան տանելուց հետո խուզարկում են սենյակը, 2 հատ հեռախոս են գտնում, որոնք իբր մահացածների հեռախոսներն են»,-պատմեց տիկին Հասմիկը՝ նշելով, որ հեռախոսների վրա որդու մատնահետքերը չեն հայտնաբերվել:
Տիկին Հասմիկի խոսքով՝ ոստիկանությունում որդուն ծեծի են ենթարկել՝ ջարդել են կողոսկրերը, ականջները, քիթը, եւ նման կերպ ինքանխոստովանական ցուցմունք կորզել:
«Արձանագրությունն էլ եղել է ուկրաիներենով, իսկ իմ տղեն գրել, կարդալ չգիտի ուկրաիներեն: Մտածել են հայ ա, օտար ա, գլխին կսարքենք, կգնա»,-ասաց նա:
Հասմիկ Վանյանի խոսքով՝ բազմաթիվ փորձաքննություններից ոչ մեկով նրա որդու մեղավորությունն ապացուցող փաստ չի հայտնաբերվել. հիմք է ընդունվել միայն Էդգարի զանգը խաղատուն եւ ինքնախոստովանական ցուցմունքը:
«Սկզբում ասել են՝ տեսագրող սարքերը նկարել են կատարվածը: Բայց երբ Էդգարի քեռին գնացել է, ուզել է տեսագրությունները տեսնել, ասել են՝ սարքերը կոտրվել են: Նույնիսկ իմ տղան ստի դետեկտոր է պահանջել, որ ցուցմունք տա, բայց չեն համաձայնել»,-ասաց տիկին Հասմիկը:
Էդգարի մայրը համոզված է, որ Նիկոլաեւ քաղաքի դատարանը անօրինական որոշում է կայացրել:
«Դատարանը դատական ակտը կայացրել է ոչ աշխատանքային կիրակի օրով, առանց փաստաբանին տեղյակ պահելու: Մի կերպ փաստաբանին իմ տղան տեղեկացնում է, եւ շատ արագ դատավորը ցմահ ազատազրկման է տղայիս դատապարտում»,-ասաց տիկին Հասմիկը, նշելով, որ որոշում կայացրած դատավորն այժմ պաշտոնից ազատվել է:
Էդգար Գեւորգյանի փաստաբանը դիմել է Վերաքննիչ դատարան, դատը 10 րոպե է տեւել, նույնիսկ գործը չեն էլ քննել: Այժմ նրանք պատրաստվում են դիմել Վճռաբեկ դատարան:
Հասմիկ Վանյանը դիմել է ՀՀ նախագահին, գլխավոր դատախազին, ՄԻՊ-ին, արտգործնախարարություն, Ուկրաինայում Հայաստանի դեսպանատուն, Հայաստանում Ուկրաինայի դեսպանատուն, Ուկրաինայում ներքին գործերի նախարար Արսեն Ավակովին, սակայն ոչ մի արդյունք:
Տիկին Հասմիկը պնդում է, որ եթե Ուկրաինայում Հայաստանի դեսպանը հետաքրքրվեր իր տղայի գործով, այժմ նա դատապարտված չէր լինի:
Հիշեցնենք, որ Էդգար Գեւորգյանը դատապարտվել է Ուկրաինայի քրեական օրենսգրքի 115 հոդվածի 1 կետի 6-րդ մասով եւ 187 հոդվածի հատկանիշներով՝ ավազակային հարձակում եւ դիտավորյալ սպանության:
Ըստ քրեական գործի նյութերի՝ Էդգարը գումար է պարտվել, վերադարձրել է, վիճաբանություն է սկսվել, որի ընթացքումսուր կտրող, ծակող գործիքով դիտավորյալ մարմնական վնասվածքներ է պատճառել խաղատան աշխատակիցներին, որոնք մահացել են, իսկ Էդգարը հափշտակել է խաղասրահում եղած գումարը եւ դիմել է փախուստի: