Այս շաբաթ ԱՄՆ-ից ձեռներեցների եւ ներդրողների պատվիրակություն կայցելի Իրան՝ երկրի էներգետիկ արդյունաբերության ներդրումային ներուժը գնահատելու համար: Այս մասին տեղեկացնում է Mehr գործակալությունը:
Ընկերությունների եւ ձեռներեցների անունները չեն հրապարակվում: Այցի ընթացքում ամերիկացիները կհանդիպեն իշխանական մարմինների ներկայացուցիչների եւ նավթային ընկերությունների ղեկավարների հետ:
Ըստ ՌԻԱ Նովոստիի, Իրանի նավթի փոխնախարար Աբբաս Շերի-Մոգհադամը հաստատել է տեղեկությունը եւ նշել, որ պատժամիջոցների վերացումից հետո ամերիկյան խոշոր ընկերությունների հետ համագործակցության զարգացման հնարավորություն է ստեղծվել: Իրանի հետ համատեղ նախագծերի իրականացման հնարավորությամբ հետաքրքրված են նաեւ եվրոպական որոշ ընկերություններ:
Հիշեցնենք, որ միջազգային միջնորդների «վեցյակը» բանակցություններ է վարում Թեհրանի հետ՝ նպատակ ունենալով երաշխիքներ ստանալ Իրանի միջուկային ծրագրի խաղաղ բնույթի վերաբերյալ՝ միջազգային պատժամիջոցները վերացնելու դիմաց:
