Գյումրիի բնակիչ Կարեն Մկրտչյանին սպանելու մեջ մեղադրվող Կարինե Սոբչենկոն պնդում է, որ մանկուց տառապում է հոգեկան հիվանդությամբ եւ տարիներ շարունակ բուժում է ստացել տարբեր հոգենյարդաբանական հաստատություններում։ Այս մասին այսօր՝ մայիսի 4-ին, Երեւանի Էրեբունի եւ Նորք-Մարաշ վարչական շրջանների ընդհանուր իրավասության դատարանում քրեական գործում առկա գրավոր ապացույցների հրապարակումից հետո հայտարարեց ամբաստանյալը։ Այնուամենայնիվ, նախաքննական փուլում նշանակված ստացիոնար դատահոգեբանական-դատահոգոբուժական փորձաքննության համաձայն՝ Կարինե Սոբչենկոյի մոտ առկա չեն հոգեբանական շեղումներ, միայն դեպքի օրը վերջինը գտնվել է էմոցիոնալ անկայուն վիճակում, ինչը ըստ փորձագետների՝ նրան մեղսունակ է դարձնում։
Նշենք, որ գործում առկա է Լոռու մարզային հոգենյարդաբանական դիսպանսերից գրություն, որում նշված է, որԿարինե Վիկտորի Սոբչենկոն Լոռու մարզային հոգենյարդաբանական դիսպանսերում հաշվառված է եղել 18.06.1987թ.՝ «Թեթև դեբիլություն՝ փսիխոպատանման վարքով» ախտորոշմամբ։ 1993թ. բնակության վայրի փոփոխության կապակցությամբ հանվել է հաշվառումից։
Այսօրվա դատական նիստին Կարինե Սոբչենկոն նաեւ վստահեցրեց, որ հաշվառված է «Ավան» հոգեկան առողջության կենտրոնում։
«Աղի հանքում եմ պառկել երկար ժամանակ»,-ասաց ամբաստանյալ Կարինե Սոբչենկոն:
Դատարանում հրապարակված գրավոր ապացույցների շարքում էին նաեւ դատակենսաբանական փորձաքննության արդյունքները, որը հաստատում է, որ սպանության գործիք հանդիսացող դանակի վրա առկա են եղել մարդու այրան հետքեր։
Հրապարակվեց նաեւ Կարինե Սոբչենկոյի հեռախոսազանգերի վերծանությունը, որով երեւում է, որ դեպքից հետո Կարինեն զանգահարել է վարձակալությամբ իրեն սենյակ տրամադրած Խաչիկ Մարգարյանին եւ տեղեկացրել, որ դանակով երկու անգամ խփել է Կարենի կրծքավանդակին։
Գրավոր ապացույցների հրապարակումից հետո ամբաստանյալ Կարինե Սոբչենկոն պետք է հարցաքննվեր, սակայն նա դատարանից ժամանակ խնդրեց՝ պատճառաբանելով, որ իրեն վատ էր զգում։ Կարինե Սոբչենկոն կհարցաքննվի հաջորդ դատական նիստին՝ մայիսի 11-ին։
Հիշեցնենք, որ ամբաստանյալ Կարինե Սոբչենկոյին մեղադրանք է առաջադրվել` ՀՀ քր.օր-ի 104 հոդվածի 1-ին մասով այն բանի համար, որ նա 30.06.2014թ. Երևանի Անդրֆեդերացիայի 1-ին նրբանցքի թիվ 2 տան նկուղային հարկում գտնվող սենյակներից մեկում, վրդովված լինելով Կարեն Մկրտչյանի կողմից իրեն սեռական հարաբերության առաջարկ կատարելու հանգամանքից, խոհանոցային դանակով երկու անգամ հարվածել է վերջինիս կրծքավանդակին, դիտավորությամբ ապօրինաբար նրան զրկելով կյանքից: Կարինեն պնդում է, որ Կարենը փորձել է բռնաբարել իրեն։
