«Բանդայի գործով» ամբաստանյալ, արդեն 3.5 տարի ազատազրկման մեջ գտնվող Քյարամ Ամոյանի գործով դատական նիստն այսօր՝ մայիսի 5-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում հետաձգվեց մեղադրող Սասուն Խաչատրյանի չներկայանալու պատճառով: Դատավոր Մեսրոպ Մակյանը տեղեկացրեց, որ դատախազը դատական նիստին չի ներկայացել զբաղվածության պատճառով:
Քյարամ Ամոյանի փաստաբանը NEWS.am-ի հետ զրույցում ասաց, որ հայտնի է նշանակված դատահոգեբուժական փորձաքննության պատասխանը, սակայն այն կարող է հրապարակել միայն դատարանը:
«Քյարամը իրոք հիվանդ է, նրան ուժեղ հոգեմետ դեղեր են ներարկում, նոր են բերում դատարան, չնայած ինքը ոչինչ չի ընկալում»,-ասաց փաստաբանը:
Քյարամ Ամոյանի մայրը՝ Կարինե Ամոյանն էլ NEWS.am-ին ասաց, որ լուրջ բուժում է հարկավոր. «Որդիս նույնիսկ ինձ չի ճանաչում»։
Հաջորդ դատական նիստը նշանակվեց հունիսի 15-ին:
Նշենք, որ 2014թ.-ի մայիսի 7-ին հաշվի առնելով դատաբժշկական փորձաքննության արդյունքները՝ Կենտրոն եւ Նորք Մարաշ ընդհանուր իրավասության դատարանը որոշել էր Քյարամ Ամոյանի մասն առանձնացնել եւ 6 ամսով հետաձգել քննությունը: Նոյեմբերի 10-ին քննությունը վերսկսվել էր: 2015թ. փետրվարին կրկնակի դատահոգեբուժական փորձաքննություն էր նշանակվել, որից հետո դատավարությունը նորից հետաձգվել էր:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցավորության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Դավիթ Գալստյանը, Արթուր Մանուկյանը եւ Սամվել Դավթյանը դատապարտվել են 11-15 տարվա ազատազրկման: