NASA-ն հաստատել է 2030-ական թվականներին Մարս տիեզերագնաց ուղարկելու մտադրությունը: Դեպի Մարս մարդու ուղեւորության նախապատրաստման հարցերին նվիրված միջազգային համաժողովի ժամանակ այս մասին հաղորդել է ԱՄՆ տիեզերական գործակալության տնօրեն Չարլզ Բոլդենը:
ՏԱՍՍ-ի փոխանցմամբ, համաժողովը նախաձեռնել են Ջորջ Վաշինգտոնի անվան համալսարանն ու ԱՄՆ խոշորագույն տիեզերական ընկերությունները: Բոլդենի խոսքով, Մարսն ԱՄՆ-ի համար կարեւորագույն նշանակություն ունի:
«Այն, ինչ մենք կիմանանք Կարմիր մոլորակի մասին, կարող է մեզ շատ բան պատմել Երկրի պատմության եւ ապագայի մասին: Մարսի հետազոտությունը մեզ կօգնի նաեւ բացահայտել Երկրից դուրս կյանքի գոյության գաղտնիքը»,- ասել է Բոլդենը:
Նա նաեւ հավելել է, որ 2020 թվականին ծրագրվում է Mars 2020 նոր մարսագնաց կառուցել: «Այն կօգնի մեզ նախապատրաստվել Մարսի առաքելությանը»,- ամփոփել է NASA-ի ղեկավարը: