Վաշինգտոնում ՀՀ նախագահ Սերժ Սարգսյանի աշխատանքային այցը սկսվեց հանդիպումից Սենատում, որին մասնակցեցին Արիզոնայից ընտրված սենատոր Ջոն Մաքքեյնը, Ռոդ Այլենդից սենատոր Ջեք Ռիդը եւ Նյու Ջերսիից սենատոր Ռոբերտ Մենենդեզը, Սենատի հանրապետական մեծամասնության ղեկավար Միթչ ՄքՔոնելը:
Սենատից հետո կայացավ հանդիպումը ԵԱՀԿ ՄԽ ամերիկյան համանախագահ, դեսպան Ջեյմս Ուորլիքի հետ:
Սերժ Սարգսյանի աշխատանքային այցի երկրորդ օրը կսկսվի Վաշինգտոնի Հոլոքոստի թանգարան այցելությունից, որից հետո նա կայցելի Միացյալ Նահանգների Կոնգրեսի գրադարան, որտեղ կծանոթանա Հայաստանին վերաբերող նմուշներին եւ կմասնակցի նոր նամականիշի մարման արարողությանը:
ՀՀ նախագահի աշխատանքային այցի շրջանակներում Միացյալ Նահանգների եւ Հայաստանի միջեւ կստորագրվի «Առեւտրի և ներդրումների մասին» համաձայնագիրը, որը միտված է նպաստել երկրների միջեւ առեւտրի և ներդրումների ընդլայնմանը եւ աջակցել կոռուպցիայի դեմ պայքարին:
Մայիսի 7-ին Սերժ Սարգսյանը Վաշինգտոնի ազգային մայր տաճարում կմասնակցի Հայոց ցեղասպանության զոհերի հիշատակին նվիրված միջկրոնական աղոթքին եւ հանդես կգա ելույթով: