Մակեդոնիայի մայրաքաղաք Սկոպյեում, մայիսի 5-ին տեղի ունեցած հակակառավարական բողոքի ակցիայի ժամանակ շուրջ 200 մարդ է վիրավորվել, այդ թվում 13 ոստիկան: Այս մասին հաղորդում է երկրի ՆԳ նախարարությունը:
Բողոքի ակցիային մասնակցել է շուրջ 2 հազար մարդ: Նրանք հրդեհել են աղբամանները եւ ոստիկանական մեքենաները, կոտրել կառավարության շենքի պարսպի մի մասը: Բազմությունը ցրելու համար իրավապահները արցունքաբեր գազ են կիրառել:
Անկարգություններն սկսվել են այն բանից հետո, երբ գլխավոր ընդդիմադիր կուսակցության՝ Մակեդոնիայի սոցիալ-դեմոկրատական միության առաջնորդ Զորան Զաեւը երկրի վարչապետ Նիկոլա Գրուեւսկիին մեղադրել է 2011-ի հունիսին սպանված 22-ամյա Մարտին Նեշկովսկիի սպանության հանգամանքները թաքցնելու մեջ, հաղորդում է «ՌԻԱ նովոստին»:
Զաեւի պնդմամբ, Նեշկովսկիին հանրահավաքի ժամանակ ծեծելով սպանել են վարչապետի թիկնապահները: Ընդդիմադիր գործիչն իր հայտարարությունները հիմնավորող ձայնագրություններ է ներկայացրել, որտեղ վարչապետն ու ՆԳ նախարար Գորդան Յանկուլոսկան, իբր, քննարկում են մարդասպանի ինքնությունը թաքցնելու ռազմավարությունը:
