Ազգային ժողովի Տարածքային կառավարման եւ տեղական ինքնակառավարման հանձնաժողովի փորձագետ Վահագն Գեւորգյանը նորմալ է վերաբերում, որ ՀՀԿ-ն որոշել է իրեն սատարել Աբովյանի ընտրություններում: Այս մասին NEWS.am-ի թղթակցի հետ զրույցում ասաց Վահագն Գեւորգյանը:
Հարցին, թե ՀՀԿ-ի սատարումով ավելի հեշտ կլինի ընտրություններում հաղթելը. նա նշեց հետեւյալը. «Իհարկե, Աբովյանում կան նաեւ Հանրապետական կուսակցության անդամներ»:
Վահագն Գեւորգյանը հրաժարվեց պատասխանել այլ հարցերի: Նա նշեց, որ մինչեւ ընտրությունների ավարտը որոշել է հարցազրույց չտալ: Դիտարկմանը, թե ով է ձեզ հուշել այդպես վարվել՝ Խաչիկ Գալստյանը, ով, ըստ շրջանառվող տեղեկությունների, պետք է լինի նրա խոսնակը, ապագա թեկնածուն ասաց, որ «Խաչիկն իմ ընկերն է, դա իր որոշումն է»:
Նշենք, որ Աբովյանի քաղաքապետ Կարապետ Գուլոյանին նշանակել են Կոտայքի մարզպետ: Հունիսի 7-ին, կկայանան ընտրություններ Աբովյան քաղաքում: Առաջադրումները սկսվելու են մայիսի 13-17, իսկ թեկնածուների գրանցումը կկատարվի մայիսի 17-19-ը: Հանրապետականը որոշել է ընտրություններին սատարել Վահագն Գեւորգյանին, ով, ի դեպ, հայտնի է որեպս Ծառուկյանի օգնական եւ նրա թեկնածու: Նրա հիմնական մրցակիցը համարվում է ՀՀԿ-ական Արթուր Հարությունյանը՝ Պալաչը:
