Սահմանադրական բարեփոխումների մասնագիտական հանձնաժողովն աշխատում է մեկ՝ կառավարման խորհրդարանական համակարգի անցման նախագծի վրա: Այդ մասին «Ազատություն» ռադիոկայանին հայտնել է հանձնաժողովի անդամ Վարդան Պողոսյանը։
«Մենք աշխատում ենք մեկ նախագծի վրա, եւ, կախված քաղաքական կոնսուլտացիաների բնույթից, քաղաքական ուժերի առաջարկություններից, հնարավոր են նաեւ որոշակի մոդիֆիկացիաներ նախագծում: Չեմ բացառում, որ մեկ նախագծի մեջ լինեն նաեւ տարբեր այլընտրանքներ: Չնայած դրա հավանականությունը շատ քիչ եմ համարում, որովհետեւ մասնագիտական առումով Սահմանադրական հանձնաժողովը, կարծում եմ, վերջնական մասնագիտական եզրահանգում է կատարել ի օգուտ խորհրդարանական համակարգի», - փոխանցեց Պողոսյանը:
Ի դեպ, ավելի վաղ իշխող Հանրապետականը չէր բացառել, որ Ազգային ժողովի քննարկմանը կարող է ներկայացվել սահմանադրական բարեփոխումների երկու փաթեթ՝ նաեւ կառավարման գործող կիսանախագահական համակարգը կատարելագործող:
Ինչպես ավելի վաղ հայտնել էր NEWS.am-ը, Սահմանադրության փոփոխությունների մասնագիտական հանձնաժողովը Սահմանադրության փոփոխությունների հայեցակարգի վերաբերյալ առաջարկություններ է ստացել քաղաքական 14 ուժերից։
Մայիսի 8-ին կայացած աշխատանքային նիստում հանձնաժողովի նախագահ Գագիկ Հարությունյանը տեղեկացրել էր, որ Սահմանադրության առաջին 3 գլուխներն արդեն պատրաստ են, եւ մայիսի 15-ին հանձնաժողովը կքննարկի կառավարման համակարգին վերաբերող բաժինները՝ Նախագահ, Ազգային ժողով, Կառավարություն:
Մայիսի 18-19-ին հայեցակարգը կքննարկվի Վենետիկի փորձագետների հետ, Փարիզում, իսկ ամսի 22-ին հանձնաժողովը հանդես կգա մամուլի ասուլիսով: