Համաշխարհային բանկի տնօրեն Կլաուդիա Կոստինը հետաքրքված է դպրոցներում «Շախմատ» առարկայի ներդրման փորձով: Այս մասին նա նշել է այսօր՝ մայիսի 14-ին, Հայաստանի ԿԳ նախարար Արմեն Աշոտյանի հետ հանդիպման ժամանակ:
Նշենք, որ մայիսի 14-15-ը Երեւանում անցկացվող Եվրոպական բարձրագույն կրթական տարածքի նախարարական գագաթաժողովի եւ Բոլոնիայի գործընթացի 4-րդ քաղաքական ֆորումի շրջանակներում ՀՀ կրթության եւ գիտության նախարար Արմեն Աշոտյանն այսօր հանդիպում է ունեցել Համաշխարհային բանկի տնօրեն Կլաուդիա Կոստինի հետ: Անդրադարձ է կատարվել Համաշխարհային բանկի ֆինանսավորմամբ «Կրթության որակ եւ համապատասխանություն» առաջին եւ երկրորդ վարկային, ինչպես նաեւ «Հանրակրթության բարելավման ծրագրի նախապատրաստման» դրամաշնորհային եւ «Կրթության բարելավում» վարկային ծրագրերին:
Ողջունելով հյուրին` Արմեն Աշոտյանը նշել է, որ ՀԲ-ի աջակցությամբ իրականացվող ծրագրերից մեկն ավարտվել է, երկրորդը` մեկնարկել եւ անհրաժեշտ է հնարավորինս արագացնել վերջինիս ընթացքը, մասնավորապես, ավագ դպրոցների շինարարական աշխատանքների հետ կապված: Արմեն Աշոտյանը բարձր է գնահատել նաեւ ՀԲ-ի աջակցությամբ «Նորարարությունների մրցակցային հիմնադրամ»-ի կողմից Հայաստանի բարձրագույն կրթության ոլորտում իրականացվող բարեփոխումների շրջանակներում հիմնված կենտրոնների գործունեությունը` ընդգծելով, որ այն կոնկրետ ծրագիր է` իր գիտական բովանդակությամբ եւ մասնավոր հատվածի ներդրումների կարեւորության տեսանկյունից:
Համաշխարհային բանկի տնօրեն Կլաուդիա Կոստինը, բարձր գնահատելով գիտակրթական ոլորտում ձեւավորված համագործակցությունը, ընդգծել է, որ հետաքրքված է հանրակրթական ուսումնական հաստատություններում «Շախմատ» առարկայի եւ 2015-2016 ուսումնական տարվանից հինգ առաջատար դպրոցներում փորձնական նոր ծրագրի` «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» մասնագիտական առարկաների ներդրման Հայաստանի փորձով:
Հանդիպման ընթացքում քննարկվել են նաեւ երկկողմ հետաքրքրություն ներկայացնող այլ հարցեր: