Մայիսի 14-15-ը Երեւանում անցկացվող Եվրոպական բարձրագույն կրթական տարածքի նախարարական գագաթաժողովի եւ Բոլոնիայի գործընթացի 4-րդ քաղաքական ֆորումի շրջանակներում ՀՀ կրթության եւ գիտության նախարար Արմեն Աշոտյանն այսօր հանդիպում է ունեցել ԵՄ կրթության, մշակույթի, երիտասարդության եւ սպորտի հարցերով հանձնակատար Տիբոր Նավրաչիչի հետ: Նախարարը շնորհակալություն է հայտնել Եվրոպական միությանը եւ անձամբ հանձնակատարին աջակցության համար` գագաթաժողովի կազմակերպչական, ֆինանսական եւ մեթոդաբանական օգնության հարցերում (ֆոտոռեպորտաժ):
Արմեն Աշոտյանը, խոսելով Բոլոնյան գործընթացի մասին ընդհանրապես եւ երեւանյան գագաթաժողովի մասին մասնավորապես, բարձր է գնահատել կրթության եւ գիտության ոլորտում ընթացող ինտեգրացիոն գործընթացի ներկա զարգացումները: Նախարարի խոսքով` հակամարտող երկրների համար կրթությունը կարող է դառնալ շատ կարեւոր գործիք` տարածաշրջանային հակամարտությունների կարգավորման գործընթացներում: Արմեն Աշոտյանն ընդգծել է, որ հայ ուսանողների համար փակ սահմանների պայմաններում կրթությունը դառնում է ոչ մատչելի` այս համատեսքստում կարեւորելով կրթության միջազգայնացման խնդիրը:
Հանձնակատարն իր հերթին նշել է, որ անհրաժեշտ է արդիականացնել եվրոպական բարձրագույն կրթության տարածքը` ընդգծելով ուսանողների շարժունության եւ փոխանակման ծրագրերը: Նա հույս է հայտնել, որ Երեւանյան գագաթաժողովը կունենա վճռորոշ եւ պատմական նշանակություն` եվրոպական կրթական միասնական տարածքի ընդլայնման համար, նոր շունչ կհաղորդի ողջ տարածքում իրականացվող կրթական բարեփոխումերին: Հանձնակատարը նաեւ կարեւորել է հարեւանության գործընթացը` որպես կրթամշակութային կամուրջ հարեւան երկրների միջեւ:
Նախարարն անդրադարձել է Tempus եւ Erasmus + ծրագրերին եւ դրանցում ՀՀ բուհերի ներգրավման խնդիրներին, շեշտել երկկողմ հորիզոնական կապերի խորացման անհրաժեշտությունը:
Հանդիպման ավարտին կողմերը կարեւորել են Երեւանի կոմյունիկե եւ Բոլոնիայի 4-րդ քաղաքական ֆորումի հայտարարագրի ընդունումը եւ դրանց հետագա նշանակությունը:
