Հայաստանը դժվար թե կարողանա դառնալ Մերձավոր Արեւելքից Եվրոպա նավթամթերքների տրանզիտի ճանապարհ։ Այս մասին մայիսի 15-ին՝ «Հյուսիս-Հարավ» ավտոմայրուղու շինարարությանը նվիրված խորհրդարանական լսումների ժամանակ, հայտարարեց ՀՀ էկոնոմիկայի առաջին փոխնախարար Գարեգին Մելքոնյանը։
«Այսպես, թե այնպես, ամենահարմար նավթային փոխադրամիջոցը ծովային ճանապարհն է։ Դա երկաթուղային փոխադրումներից, էլ չասած մեքենայով փոխադրելուց ավելի էժան է։ Այսուհանդերձ «Հյուսիս-Հարավ» մայրուղին կարող է տրանզիտ ապահովել մի շարք այլ ապրանքների համար։ Բնականաբար Հայաստանի տուրիստական նշանակությունը մեծանում է, թեպետ հիմա դժվար է ասել, թե որքանով, քանի որ շինարարությունը կավարտվի 2020թ.»,- ասաց Մելքոնյանը։
«Հյուսիս-Հարավ» քառագոտի մայրուղին կկրճատի Իրանից մինչեւ Վրաստանի սահման հասնելու ժամանակը, ինչպես նաեւ ներկայիս 556 կմ հեռավորությունը մինչեւ 500 կմ-ի՝ մի շարք լեռնային հատվածներ ուղղելու եւ ավելի ուղիղները կառուցելու հաշվին (Արարատ քաղաքից մինչեւ Սիսիանի մարզի Նորավան գյուղ՝ Վայոց ձորի մարզով, իսկ այդտեղից՝ մինչեւ Քաջարան քաղաք): Շինարարության ընդհանուր արժեքը կազմում է շուրջ 960 մլն դոլար, նախագծի հիմնական դոնորը Զարգացման ասիական բանկն է (շուրջ 500 մլն դոլար):
