ՀՀ Կենտրոնական բանկի լրատվական ծառայությունից NEWS.am-ին որոշ պարզաբանումներ են ներկայացրել «Կենտրոնական բա՞նկն է սխալ տեղեկություններ հաղորդում, թե՞ առեւտրային բանկերը» լուրի կապակցությամբ, որում նշված էր այն հակասությունների մասին, որ առկա է բանկային համակարգի եկամուտների վերաբերյալ ԿԲ հրապարակման եւ առեւտրային բանկերի ֆինանսական հաշվետվությունների միջեւ։
Ըստ ԿԲ-ից ստացված պարզաբանման՝ այդ հակասություններն առաջանում են այն պատճառով, որ ԿԲ մեթոդաբանությունը եւ բացվածքը տարբերվում են այն մեթոդաբանությունից եւ բացվածքից, որ ներկայացնում են առեւտրային բանկերը։ Վերջիններիս հաշվետվությունները համապատասխանում են միջազգային ստանդարտներին, իսկ ԿԲ մեթոդաբանությունը հարմարեցված է վերահսկողության արդյունավետության պահանջներին։
NEWS.am-ը չի ողջունում նման մեթոդաբանական տարբերությունները, որի հետեւանքով ստեղծվում է տվյալների խառնաշփոթ, իսկ անկախ վերլուծաբանները լիարժեք վերլուծություններ կատարել չեն կարողանում։ Կարծում ենք՝ հասարակությունը, որի մի ստվար զանգված հանդիսանում են բանկերի հաճախորդներ՝ ավանդատուներ, վարկառուներ, փայատերեր, բանկային այլ ծառայությունների օգտատերեր, պետք է բանկային համակարգի մասին լիարժեք ու նույնական տեղեկատվություն ստանալու հնարավորություն ունենան։