Բոսթոնի մարաթոնի ժամանակ՝ 2013թ. ահաբեկչություն իրականացնելու մեջ մեղադրվող չեչեն Ջոհար Ցարնաեւը դատապարտվել է մահվան: Նման վճիռ են կայացրել 12 երդվյալ ատենակալները: Մահապատիժն իրականացվելու է մահացու ներարկման միջոցով:
Վճիռը հրապարակելու պահին Ցարնաեւը հանգիստ է եղել եւ նստած է եղել՝ խաչված ձեռքերով: Ատենակալներից ոմանք վճիռը հրապարակելուց հետո արտասվել են, հաղորդում է RBC-ն:
Նշվում է, որ Ցարնաեւին կուղարկեն Ինդիանա նահանգի Տերրե-Խոտե բանտ, որտեղ պահվում են մահվան դատապարտվածները: Այնտեղ նա գտնվելու է մինչեւ մահապատժի իրականացումը, որը կարող է ձգվել տարիներ բողոքարկումների պատճառով:
Ջոհար Ցարնաեւը եղբոոր՝ Թամերլանի հետ ահաբեկչություն էր կազմակերպել 2013թ. Բոսթոնի մարաթոնի ընթացքում: 3 մարդ զոհվել, 250-ից ավելին վիրավորվել էին: Նրանք մեղադրվում են նաեւ հանցագործների հետապնդման մասնակից ոստիկանի սպանության մեջ: Թամերլան Ցարնաեւը ձերբակալվելիս սպանվել էր, Ջոհարին կարողացել էին ողջ բռնել: