Զարգացման եւ վերակառուցման եվրոպական բանկը (ՎԶԵԲ) դիտարկում է «Մետաքսի ճանապարհի» նախագծերի ֆինանսավորմանը մասնակցելու հնարավորությունը: Այս մասին մայիսի 17-ին հայտարարել է ՎԶԵԲ ղեկավար Սումա Չակրաբարտին:
Նրա խոսքով, Ղազախստանը, Վրաստանն ու Ղրղըզստանը դիմել են ՎԶԵԲ-ին՝ «Մետաքսի ճանապարհի» նախագծերի ֆինանսավորմանը բանկի մասնակցության առիթով, եւ կառույցը դիտարկում է նման հնարավորությունը:
ՏԱՍՍ-ի փոխանցմամբ, Չակրաբարտին նաեւ հավելել է, որ ՎԶԵԲ-ն արդեն սկսել է համագործակցել Ենթակառուցվածքային ներդրումների Ասիական բանկի հետ, որը, ինչպես ծրագրվում է, ֆինանսավորելու է «Մետաքսի ճանապարհի» շրջանակում իրականացվող նախագծերը:
«Մետաքսի ճանապարհի» տնտեսական գոտին Ասիայի եւ Եվրոպայի երկրների միջեւ տրանսպորտային, էներգետիկ, առեւտրային միջանցքի ստեղծման նախագիծ է, որի համար Չինաստանն արդեն մտադիր է 40 մլրդ դոլար ներդնել հատուկ հիմնադրամի միջոցով:
