2 տարում էլեկտաէներգիայի սակագինը բարձրանում է 100%-ով, ինչն իր հերթին կբերի ապրանքների թանկացման: Այսօր՝ մայիսի 18-ին, լրագրողների հետ զրույցում նման կարծիք հայտնեց «Սպառողների խորհրդատվություն» կենտրոնի նախագահ Կարեն Չիլինգարյանը:
Նրա խոսքով՝ ՀԷՑ-ը կառավարման խնդիրներ ունի, քանի որ առ այսօր անհասկանալի է, թե տարեկան ներդրումներն ինչի վրա են ծախսվում:
«Էներգետիկայի նախարարությունը պետք է հետաքննություն սկսի՝ պարզելու, թե ինչ է կատարվում ՀԷՑ-ում, ինչու է էլեկտրաէներգիայի սակագինն անընդհատ բարձրանում»,- նշեց Կարեն Չիլինգարյանը:
Սոցիոլոգ Ահարոն Ադիբեկյանի կարծիքով էլ՝ հոսանքի թանկացման հետեւանքով թանկանալու են շատ ծառայություններ:
«Դժվար է կոնկրետ ասել, թե ինչքան կլինի գնաճը էլեկտրաէներգիայի սակագնի բարձրացումից հետո, բայց որ օրինակ, կարկանդակը 60 դրամից կդառնա 70, կամ սառնարաններ ունեցող խանութներն իրենց ապրանքները կթանկացնեն, դա հաստատ է»,- ավելացրեց նա:
Նշենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը, նախնական մոտ 16 դրամով բարձրացնելու համար։ Հոսանքի թանկացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի ցանկացած ՀՀ քաղաքացու գրպանին։