ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում առանձնապես խոշոր չափերով խարդախություն կատարելու դեպքի առթիվ հարուցված քրեական գործի շրջանակներում բացահայտվել է առեւտրային կաշառք պահանջելու եւ ստանալու դեպք:
ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնից հայտնում են, թե Աջափնյակ եւ Դավթաշեն վարչական շրջանների քննչական բաժնում ապրիլին հարուցվել է քրեական գործ՝ քաղաքացի Գ.Պողոսյանի կողմից Երեւանի բնակչուհուց խարդախությամբ 3.200.000 ՀՀ դրամ հափշտակելու դեպքի առթիվ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետի հատկանիշներով:
Հարուցված քրեական գործի շրջանակներում ձեռնարկված քննչական գործողությունների արդյունքում բացահայտվել է նույն բնակչուհուց առեւտրային կաշառք պահանջելու դեպք։
Մասնավորապես՝ նրա օգտին գործողություններ կատարելու, այն է՝ բանկում գրավադրված բնակարանն աճուրդի եղանակով նույն տան բնակչուհու համար շահավետ գնով օտարելու գործընթացը կազմակերպելու, այդ գործընթացին կողմնակի անձանց մասնակցությունը չթույլատրելու եւ գործընթացը ձգձգելու դիմաց սնանկության գործերով կառավարիչը պահանջել է 2.500.000 դրամ առեւտրային կաշառք։
Քննության տվյալներով՝ կառավարիչը բնակչուհուց գումարն ստացել է քաղաքացի Գ.Պողոսյանի միջոցով՝ մաս-մաս ։
Ձեռք բերված ապացույցների հիման վրա՝ սնանկության գործով կառավարչին մեղադրանք է առաջադրվել ՀՀ քրեական օրենսգրքի 200-րդ հոդվածի 3-րդ մասի հատկանիշներով:
Նախաքննությունը շարունակվում է, միջոցներ են ձեռնարկվում՝ դեպքի բազմակողմանի եւ լրիվ հետազոտումն ապահովելու ուղղությամբ:
