Վերնիսաժի գործով ամբաստանյալ Գոռ Առաքելյանն իրեն մեղսագրվող արարքը կատարելիս հոգեկան խիստ հուզական վիճակում չի եղել: Այս մասին այսօր՝ մայիսի 19-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում ասաց մեղադրող Հարություն Սարգսյանը ՝ ավելացնելով, որ դատահոգեբանական եւ դատահոգեբուժական համալիր փորձաքննություն անցկացնելու մասին պաշտպանակաՆ կողմի միջնորդությունն անհիմն է եւ ենթակա է մերժման:
«Ինչպես նախաքննության, այնպես էլ դատաքննության ընթացքում գործով ձեռք չեն բերվել այնպիսի փաստական տվյալներ, որոնք վկայում են, որ Գոռ Առաքելյանը գտնվել է հոգեկան խիստ հուզական վիճակում: Դեպքի ընթացքում նրա նկատմամբ երկարատեւ ճնշումներ չեն եղել: Գոռ Առաքելյքանը նստել է մեքենան, այնուհետեւ իջել եւ կրակել Ներսես Մելքոնյանի եւ Վալերիկ Հովհաննիսյանի ուղղությամբ: Այսինքն հանկարծակի առաջացած իրավիճակ չի եղել, որ աֆեկտի վիճակում հայտնվեր ամբաստանյալը»,-ասաց նա:
Գոռ Առաքելյանի պաշտպանը՝ Երեմ Սարգսյանն նախորդ դատական նիստին իր ներկայացրած միջնորդության մեջ եւս 1 կետ խնդրեց ավելացնել՝ այն է, որ դատահոգեբանական եւ դատահոգեբուժական համալիր փորձաքննությանը մասնակցեն փորձագետներ, այլ ոչ թե մասնագետներ, այլապես ինքը բացարկի միջնորդություն կներկայացնի նրանց:
Դատավորը հեռացել է խորհրդակցական սենյակ՝ միջնորդության մասին որոշում կայացնելու:
Հիշեցնենք, որ 2014թ. մայիսի 17-ին՝ ժամը 13:30-ի սահմանում կրակոցներ էին հնչել «Վերնիսաժի» տարածքում։ Ըստ մեղադրական եզրակացության՝ Գոռ Առաքելյանը (ԱԺ պատգամավոր Կարո Կարապետյանի փեսան) Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ վեճի բռնվելով Վալերիկ Հովհաննիսյանի եւ Ներսես Մելքոնյանի հետ, փորձել է ապօրինաբար դիտավորությամբ կյանքից զրկել նրանց, ինչպես նաեւ անկանոն կրակ է բացել՝ ծանր մարմնական վնասվածքներ հասցնելով պատահական անցորդների։ Գոռ Առաքելյանը մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու, ինչպես նաեւ երկու եւ ավելի անձանց առողջությանը ծանր, մեկ անձի՝ միջին ծանրության վնաս պատճառելու համար, իսկ խափանման միջոց է ընտրվել կալանավորումը։ Ավելի ուշ կալանավորվել են նաեւ Ներսես Մելքոնյանը եւ Վալերիկ Հովհաննիսյանը՝ խուլիգանության մեղադրանքով։
Նշենք, որ դատախազ Հարություն Սարգսյանն փոխել է առաջադրվող մեղադրանքը, որով ամբաստանյալը ոչ թե դիտավորյալ սպանության փորձ է կատարել, այլ դիտավորությամբ մարմնական վնասվածքներ է հասցրել տուժողների։ Գոռ Առաքելյանն այժմ մեղադրվում է Քրեական օրենսգրքի 34-104-րդ հոդվածի 2-րդ մասի, 1-ին, 6-րդ եւ 10-րդ կետերով, 112-րդ հոդվածի 2-րդ մասի, 1-ին, 5-րդ, 9-րդ կետերով, 113-րդ հոդվածի 2-րդ մասի 6-րդ, կետով, 235-րդ հոդվածի 1-ին մասով: Վալերիկ Հովհաննիսյանին եւ Ներսես Մելքոնյանին մեղադրանք է առաջադրվել Քրեական օրենսգրքի 258-րդ հոդվածի 3-րդ մասի 1-ին կետով: Երեքի դեպքում էլ խափանման միջոց է ընտրվել կալանավորումը: